Саха сиригэр Хаачыстыба аан дойдутааҕы күнүгэр тэрээһиннэр буолуохтара

Быйыл сэтинньи 10 күнүттэн 16 күнүгэр диэри Арассыыйаҕа Хаачыстыба аан дойдутааҕы нэдиэлэтэ буолуоҕа, ол чэрчитинэн Хаачыстыба күнэ бэлиэтэниэ. Маны Минпромторг, Минэкономразития, Росстандарт, Росаккредитация өйөбүллэринэн Роскачество ыытыаҕа.

Бу чэрчитинэн хаачыстыбаны үрдэтии бастыҥ холобурдарын билсиэхтэрэ, диэн sakha.gov.ru суруйар.

Саха сиригэр бу нэдиэлэ кэмигэр кэккэ тэрээһиннэр ыытыллыахтара. Сэтинньи 12 күнүгэр Саха политехническай лиссиэйгэ “Чөл аһылык” диэн лиэксийэ-бэсиэдэ буолуоҕа.

Сэтинньи 13 күнүгэр үөрэнээччилэр уонна устудьуоннар “Дьокуускайдааҕы үүт собуота” тэрилтэҕэ сылдьыахтара. Ити күн СӨ Тыатын хаһаайыстыбатын уонна ас-үөл бэлиитикэтин министиэристибэтин “Ас-үөл бородууктатын хаачыстыбатын быһаарыы” маастар-кылаас күүтэр.