Саха сиригэр сотору кэминэн биллэрдик сылыйыа

Өрөбүллэргэ Саха сирин соҕуруу уонна киин оройуоннарыгар +15 кыраадыска диэри сылыйыаҕа. Дьокуускайга хаар түһэрэ сарсын тохтуо.

Бу туһунан Саха сиринээҕи УГМС отделын начаалынньыга Саргылана Никитина иһитиннэрдэ.
«Чугастааҕы сууккаҕа циклон Саха сирин хоту өттүгэр айанныа, онон хаар түһэрэ тохтуура күүтүллэр. Өрөбүл күннэргэ соҕуруу уонна киин оройуоннарга +10…+15 кыраадыска диэри сылыйыа. Онуоха Саха сирин хотугулуу-арҕаа өттүгэр Красноярскай кыраайтан циклон кэлэринэн, хаардаах уонна тыаллаах күн-дьыл буолара күүтүллэр», — диэн Саргылана Никитина кэпсээтэ.

Эспиэр этэринэн, муус устар 23 күнүгэр Дьокуускайга күнүс сөҥүүтэ суох, +7 кыраадыска диэри сылыйыа. Күнүс киин оройуоннарынан салгын температурата +3…+8, илин улуустарынан +8…+13, хотугулуу-арҕаа 0…-5 кыраадыска тиийиэҕэ.