Саха сиригэр халаан уута уустуктук ааһара сабаҕаланар

Саха сиригэр сааскы халаан уута уустуктук ааһара күүтүллэр. Бу туһунан бэнидиэнньиккэ, кулун тутар 24 күнүгэр,  Саха сиринээҕи Быыһыыр сулууспатын начаалынньыга Иннокентий Андросов «Якутия 24» телеханаалга  «Актуальное интервью» биэриигэ иһитиннэрдэ.

«Быйыл Бүлүү өрүһүнэн элбэх уу ааһыаҕа. Саха сирин хотугулуу-илиҥҥи өттүгэр, Индигиир уонна Халыма өрүстэригэр хаар нуорматтан намыһах. Өрүстэр ууларын уонна хаар саппааһын учуоттаан, Саха сиригэр сааскы халаан уута уустуктук ааһара күүтүллэр диэххэ сөп. Арассыыйа атын эрэгийиэннэригэр эмискэ күүскэ сылыйыы куһаҕаннык дьайара сабаҕаланар», — диэн Иннокентий Андросов кэпсээтэ.

Дьокуускайдааҕы УГМС дааннайынан, кулун тутар 20 күнүнээҕи туругунан Алдан, Амма өрүс баһыгар, Витим өрүскэ, Ленскэй таһыгар уонна ордук Бүлүү өрүс бассейныгар хаар саппааһа нуорматтан таһыма олус үрдүк. Саха сиринээҕи Быыһыыр сулууспа начаалынньыга бэлиэтээбитинэн, саас муус барыытыгар араас биричиинэлэр сабыдыаллыыллар: күһүҥҥү салгын температурата, сир сиигэ, өрүскэ муус туруута, сааскы салгын температурата, хаарга уу кээмэйэ уонна саамай сүрүнэ – муус халыҥа уонна хаар саппааһа. Саха сиригэр быйыл өрүстэр аһыллыылара ортотунан элбэх сыллаах көрдөрүүлэргэ чугас, онон арыый да эрдэ эстэллэрэ күүтүллэр.