Саха сиригэр халаан уутуттан эмсэҕэлээбиттэри тырааныспар нолуогуттан босхолуохтара
![](https://sakha-sire.ru/wp-content/uploads/2024/05/noluok.jpg)
Саха сиригэр халаан уутуттан 3,4 тыһыынчаттан тахса эмсэҕэлээччи 2023 сыллааҕы тырааныспар нолуогуттан босхолонуоҕа.
Туһааннаах быһаарыыны СӨ Бырабыыталыстыбатын иһинэн үлэлиир нолуок хамыыһыйатын мунньаҕын түмүгүнэн СӨ бастакы вице-премьерэ Дьулустаан Борисов бэрэссэдээтэллээх ааспыт мунньах түмүгүнэн өйөөтө.
«Сааскы халаан уутуттан эмсэҕэлээбит нэһилиэктэр олохтоохторугар тырааныспар нолуогар чэпчэтиилэри олохтуурга Ил Дархан Айсен Николаев этии киллэрбитэ. Ыйааҕынан эрэгийиэннээҕи ыксаллаах быһыы-майгы эрэсиимэ Нам, Өлүөхүмэ уонна Ньурба оройуоннарыгар биллэриллибитэ», – диэн СӨ Экэниэмикэҕэ миниистирэ Петр Попов бэлиэтээтэ.
Кини Саха сиригэр маннык чэпчэтиилэр 2013 сылга уонна 2018 сылга эмиэ киирбиттэрин туһунан санатта. Чэпчэтиилэр нолуок уорганнарын үлэһиттэринэн эмсэҕэлээбит дьон испииһэктэринэн оҥоһуллуоҕа. Испиһэктэри нолуок тэрилтэлэригэр муниципальнай тэриллии баһылыктара ыытыахтара. Дьүүллэһии түмүгүнэн нолуок хамыыһыйатын чилиэттэрэ көҕүлээһини өйөөтүлэр
Саха сирин бастакы вице-премьерэ Дьулустаан Борисов Экэниэмикэ министиэристибэтигэр кылгас болдьох кэмигэр «СӨ нолуок бэлиитикэтин туһунан» өрөспүүбүлүкэтээҕи сокуоҥҥа уларытыылары киллэрэргэ сокуон барылын оҥорон ыытарыгар сорудахтаата.
Сообщить об опечатке
Текст, который будет отправлен нашим редакторам: