Саха сиригэр халааҥҥа бэлэмнэнии саҕаланна

Бэҕэһээ Ил Дархан Айсен Николаев халааҥҥа бэлэмнэнии боппуруоһунан, өрөспүүбүлүкэ кылаабынай федеральнай иниспиэктэрэ Евгений Корнеев, СӨ Борокуруора Максим Попов, ЫБММ Саха сиринээҕи салаатын наалынньыга Павел Гарин, Бырабыыталыстыба чилиэннэрэ, биэдэмистибэлэр салайааччылара кыттыылаах мунньаҕы ыытта.

Күнү-дьылы кэтээн көрөр сулууспа дааннайынан, өрөспүүбүлүкэ үгүс улуустарыгар ааспыт сылга курдук хаар саппааһа элбэх уонна муус чараас. Онон сибээстээн Ил Дархан кыра өрүстэргэ үлэни ыытарга, ол иһигэр 2023 с. уу таһыма үрдээн эмсэҕэлээбит улуустарга кытыллары, даамбалары бөҕөргөтөргө соруйда.
«Саха сиригэр сааскы халаан саҕаланара үс ый эрэ хаалла. Сыл аайы сааскы халаан аһара улахан сирдээх-уоттаах уонна тыйыс килиимэттээх буоламмыт, уустуктук ааһар.
Ааспыт сылга эмиэ оннук хатыламмыта. Кыра өрүстэргэ уу хаатыттан тахсан уустук балаһыанньа үөскүү сылдьыбыта, онуоха гидротехническай тутуулар эмсэҕэлээбиттэрэ. Ол эрээри элбэх киһи сүдү күүһүнэн балаһыанньаны тутан, улахан хоромньу тахсыбатаҕа», – диэн бэлиэтээтэ Айсен Николаев.
Кини улахан өрүстэргэ ыытыллар дьаһалларга сорудахтары эмиэ биэрдэ. Чуолаан, Ил Дархан муус харар сирдэригэр хараардыы, эрбээһин үлэтин бириэмэтигэр ыытарга, взрывчаткалары бэлэмнииргэ эттэ.
Ону сэргэ Айсен Николаев гидропостары, нэһилиэнньэҕэ иһитиннэрэр систиэмэни, дьону быстах кэмҥэ олордор пууннары бэлэмнииргэ сорудахтаата.
«Биһиги ааспыт сыллардааҕы сыыһаларбытын-халтыларбытын учуоттаан халааҥҥа бэлэмнэнии үлэтигэр толору бэлэмнээх буолуохтаахпыт», – диэтэ Айсен Сергеевич.