Саха сиригэр халааҥҥа бэлэмнэниигэ 163 мөл тахса солкуобайы көрдүлэр

Сабаҕалааһын быһыытынан өрүстэр арыллар кэмнэригэр үгүс оройуоннарга балаһыанньа нуорманы иһинэн буолуоҕа.

Саха сиригэр халаан уутугар бэлэмнэниигэ 163 мөл. тахса солкуобайы көрдүлэр, итинтэн 100,5 мөл. – эрэгийиэн бүддьүөтүттэн. Бу туһунан бастакы вице-премьер Дмитрий Садовников бэйэтин телеграм-канаалыгар иһитиннэрдэ.

Сабаҕалааһын быһыытынан, үгүс оройуоннарга өрүстэр этэҥҥэ арыллыахтара. Сорох сирдэргэ, холобура, Бүлүү эбэ бассейныгар уу таһыма 0,5-1,0 миэтэрэнэн үрдүөн сөп. Саамай харыы  тахсар өрүстэрэ – Өлүөнэ, Алдан, Амма уонна Халыма.

Садовников бэлиэтээбитинэн, Саха сирин 15 оройуонугар  сааскы халаан уутун содулун аччатыыга туһуламмыт үөрэтиилэр саҕаланнылар. Уопсайа халааҥҥа бэлэмнэниигэ 163,1 мөл. солк. көрүлүннэ, итинтэн 62,6 мөл. – федеральнай үп, 100,5 мөл. – өрөспүүбүлүкэ бүддьүөтүттэн.

“Бу үп-харчы мууһу эрбэтиигэ, кутталлаах учаастактары ыраастааһыҥҥа уонна атын тэрээһиннэргэ туһаныллыахтара. Биһиги наада буолар түгэнигэр диэн 25 туонна взрывчатканан хааччыныахпыт уонна балаһыанньаны кэтээн көрүүгэ авиацияны туһаныахпыт. Ону тэҥэ 244,83 мөл. солк. суумаҕа матырыйаалы бэлэмниэхпит”, — диэтэ бастакы вице-премьер.

Халааны этэҥҥэ аһарыыга 16 тыһыынчаттан тахса киһини уонна 2,7 тыһыынча тиэхиньикэни туһаныахтара. 252 эвакопууну бэлэмниэхтэрэ.

“Муус устар ыйтан саҕалаан биһиги Арассыыйа ЫБММ кытта үлэлиэхпит уонна “Роскосмостан” өрүстэргэ балаһыанньа хайдаҕын билэргэ мобильнай комплекстары туһаныахпыт”, — диэн тоһоҕолоон эттэ Садовников.