Саха сиригэр кыыл таба ахсаанын ааҕаллар

Сэттэ сыллаах тохтобул кэнниттэн, быйыл, бэс ыйыттан СӨ Биологическай ресурсаларга, ураты харыстанар айылҕа сирдэрин уонна пааркаларын дириэксийэтин үлэһиттэрэ Өлүөнэ өрүс аллараа өттүн хаҥас кытылыгар кыыл табалар сайылыыр сирдэрин салгын аалынан сылдьан чинчийэллэр.

Кыыл таба ахсаанын быһаарар тэрээһиҥҥэ Арассыыйа наукаларын академиятын Сибиирдээҕи салаатын Криолитозона биологическай проблемаларыгар институтун үлэһиттэрэ кытталлар диэн дириэктэри солбуйааччы Иннокентий Семенов иһитиннэрдэ.

«Бу кэмҥэ кыыл табалар туундараҕа тымныы уонна тыал үрэр сиригэр улахан үөрдэринэн сылдьаллар, онон кинилэри ааҕарга табыгастаах. Хомуллубут дааннайдары оҥоруу уонна ырытыы түмүктэннэҕинэ, Өлүөнэ-Өлөөн эҥэригэр төһө кыыл таба баара биллиэ», — диэтэ кини.

Хонуу үлэтигэр 17,5 тыһыынча км² иэннээх сири кэрийэргэ икки салгын суудуната туһаныллар. Бу дьаһаллар «АЛРОСА» хампаанньа үбүлээһин көмөтүнэн тэриллэр.