Саха сиригэр ийэ үүтүн баана баар буолла

Атырдьах ыйын 3 күнүгэр М.Е.Николаев аатынан Өрөспүүбүлүкэтээҕи 1 №-дээх балыыһаҕа-Мэдиссиинэ национальнай киинигэр умнуллубат түгэн буолла – Ийэ үүтүн баана аһылынна.

Мэдиссиинэ национальнай киинин генеральнай  дириэктэрэ Станислав Жирков эҕэрдэ тылыгар эппитинэн, Мэдиссиинэ национальнай киинэ «Оҕоҕо үтүө санаалаах балыыһалар” диэн аан дойду статустаах. Ол эбэтэр манна оҕо төрөөтүн кытары ийэ уонна кырачаан киһи бииргэ буолаллара, ийэлэр оҕолорун бэйэлэрэ суулууллара, эрдэттэн эмиий үүтүнэн  эмтэрэллэрэ биһирэнэр. Перинатальнай киин исписэлиистэрэ  эдэр ийэлэр төрөөттөрүн кытта кырачааннарын эмиий үүтүнэн аһаталларыгар көмөлөһөллөр.

СӨ доруобуйа харыстабылын миниистирин солбуйааччы Любовь Бурнашева уон сыл иһигэр өрөспүүбүлүкэҕэ ийэ үүтүнэн эмтэрии ахсаана 42%, онтон  2022 сыл түмүгүнэн  71,8% элбээбитин астына бэлиэтээтэ.

СӨ Судаарыстыбаннай мунньаҕын (Ил Түмэн) дьиэ кэргэн уонна оҕо аймах дьыалаларыгар бастайааннай кэмитиэт бэрэссэдээтэлэ Алена Атласова  Ийэ үүтүн баана төрүүр болдьохторун иннинэ күн сирин көрбүт кырачааннар доруобуйаларын бөҕөргөтөргө улахан туһалаах буолуоҕун эттэ.

Ийэ үүтэ бааҥҥа 3 ый устата хараллыаҕа уонна саҥа төрөөбүт оҕолору аһатарга туттуллуоҕа.