Саха сиригэр икки ойуур баһаара умуруорулунна

Ааспыт сууккаҕа Саха сиригэр Дьааҥы уонна Нерюнгри улуустарыгар уопсайа 5 гектар иэннээх икки ойуур баһаара умуруорулунна. Бу туһунан өрөспүүбүлүкэ суһал ыстааба иһитиннэрэр.

Бэс ыйын 28 күнүнээҕи туругунан Дьааҥы уонна Өлүөхүмэ улуустарыгар 190 гектар иэҥҥэ икки ойуур баһаара умайа турар. Олору умуруорууга 111 баһаарынай тардылынна. Баһаартан сэрэхтээх буолуу  кэмин саҕаланыаҕыттан 60 тыһыынча гектартан тахса иэҥҥэ 335 айылҕа баһаара умуруорулунна, ол иһигэр 54 425,65 гектар иэҥҥэ 150 ойуур баһаара. Уоту бохсуу 70 %-ҥа тэҥнэһэр.

Баһаартан сэрэхтээх буолуу  кэм саҕаланыаҕыттан 54 буруйдаах быһаарылынна, ойуурга баһаартан сэрэхтээх буолуу быраабылатын кэһии иһин 118 боротокуол оҥоһулунна.

Санатан эттэххэ,бэс ыйын 5 күнүттэн Саха сиригэр ойуур баһаарыттан куттала суох буолуу ураты эрэсиимэ киллэриллибитэ. Ону таһынан, баһаартан куттала суох буолуу ураты эрэсиимэ Дьааҥы, Өлүөхүмэ уонна Эбээн-Бытантай улуустарыгар, ону тэҥэ Дьокуускай уонна Жатай куорат уокуруктарыгар киллэриллибитэ. Бу туһунан Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата иһитиннэрэр.