Саха сиригэр икки оройуоҥҥа хаар түстэ

От ыйын бүтэһик күннэригэр Кэбээйи уонна Үөһээ Дьааҥы улуустарыгар бастакы хаар түстэ.

Кэбээйи оройуонун Сэбээн Күөл нэһилиэгин баһылыга Алена Кривошапкина СИА иһитиннэрбитинэн, ааспыт нэдиэлэ бүтүүтүттэн олохтоохтор оһохторун отуннулар уонна бу сарсыарда эрдэ салгын температурата нулга чугаһаабыта бэлиэтэммит.

«Хаар сэлиэнньэттэн табаһыттар ыстаадалара баар сириттэн хоту өттүгэр түспүтэ. Бу сылын ахсын хатыланар көстүү. От ыйыгар хайаатар да хаар түһэр. Биһиги маннык күннэргэ мэлдьи бэлэммит, оннооҕор сайынын оһохпутун оттуохпутун сөп. Кыһын биһиэхэ киин ититиини холбууллар. Быйыл дьиҥэр сайын хаһааҥҥытааҕар да кураан буолла, от ыйын саҥатыгар 30 кыраадыстаах куйаас күннэр турбуттара. Оҕолорбут сөтүөлээбиттэрэ. Ааспыт бээтинсэттэн саҕалаан тымныйан барбыта, түүнүн олохтоохтор сибэккилэрин дьиэлэригэр киллэрэр буолбуттара. Бүгүн хара сарсыардаттан окко хаар сытарын көрбүппүт, билигин  ууллунна», — диэн Сэбээн Күөл сэлиэнньэтин баһылыга иһитиннэрдэ. Кэбээйи улууһугар хаар түһэр түгэнин «Прогноз» АУо үлэһитэ  Эдуард Ноговицын  видеоҕа уһулла. 

Ону сэргэ от ыйын бүтэһик күнүгэр Үөһээ Дьааҥы улууһун Угольнинскай нэһилиэгэр эмиэ хаар түспүтүн туһунан « Колымские новости» хаһыат биллэрдэ.

Санаттахха, «Саха сиригэр бу нэдиэлэ бүтүөр диэри сөрүүн күннэр туруохтара. Атырдьах ыйын саҕаланыыта бастакы тоҥоруулар түһэллэрэ күүтүллэр», – диэн Саха сиринээҕи УГМС салайааччытын солбуйааччы — Гидрометкиин начаалынньыга Татьяна Маршалик иһитиннэрбитэ.