Саха сиригэр иммунитеты харыстааһын нэдиэлэтэ саҕаланна

Саха сиригэр от ыйын 8 күнүттэн от ыйын 12 күнүгэр диэри  иммунитеты харыстааһын нэдиэлэтэ саҕаланна.

Бу нэдиэлэҕэ информационнай иһитиннэриилэри тарҕатыы, маассабай информация сириэстибэлэригэр ыстатыйалары таһаарыы уонна доруобуйа боппуруостарыгар  биэриилэри көрдөрүү былааннанар. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Иммунитет организмы микробтартан уонна паразиттартан харыстыыр. Доруобай иммунитеттаах киһи араас ыарыылартан куотунар, доруобай уонна толору олоҕу олорор.
Саха сирин Доруобуйа харыстабылын министиэристибэтэ доруобуйаны харыстааһыҥҥа элбэх түгэн сабыдыаллыыр эрээри, сүрүн оруола дьиэ кэргэҥҥэ туһуланар диэн иһитиннэрэр. Дьиэ кэргэн чөл олоҕу олоруу туһунан баазовай теоретическай уонна практическай билиилэри хаҥатар.