Алтынньы 14 күнүгэр Саха тыйаатырыгар Калмыкия Б.Басангов аатынан национальнай драматическай тыйаатырын гостуруолларыгар аналлаах пресс-конференция буолла.
Бу гостуруол атастаһыы гостуруоллар бырагыраамаларын чэрчитинэн ыытыллар. Ол курдук бу соторутааҕыта, балаҕан ыйын бүтэһик күннэригэр Саха тыйаатыра Элиста куоратыгар тиийэн аатырбыт Ч.Айтматов “Хаарыан хампа күөх кытылым”, Л.Пиранделло “Театрга буолбут түбэлтэ” (Шесть персонажей в поисках автора) испэктээкиллэрин ситиһиилээхтик көрдөрөн, көрөөччү үрдүк биһирэбилин ылан кэлбитэ.
Саха сирин иһитиннэрэр-сырдатар тэрилтэлэрин суруналыыстарыгар, тыйаатыр эйгэтин үлэһиттэригэр Саха сиригэр аан бастакы гостуруолларын туһунан Калмыкия театрын дириэктэрэ, Калмыкия Өрөспүүбүлүкэтин үтүөлээх үлэһитэ Галина Борисовна Шураева, театр уус-уран салайааччыта, Россия, Калмыкия Өрөспүүбүлүкэтин искусстволарын үтүөлээх диэйэтэлэ Борис Наминович Манджиев уонна тыйаатыр режиссера, Калмыкия театральнай диэйэтэллэрин сойууһун бэрэссэдээтэлэ, Калмыкия Өрөспүүбүлүкэтин норуодунай артыыһа Сергей Владимирович Бурлаченко кэпсээтилэр. Сахабыт сирэ итии истиэп дойдулаах калмыктары Бокуруоп күнүн сыа хаарынан күндүлүү көрүстэ. Халлааммыт кинилэр кэлэллэригэр анаан сылаас турар эбит диэх курдук истиҥ-иһирэх быһыы-майгы үөскээтэ.
Саха тыйаатырын ыалдьыттара Б.Басангов аатынан национальнай тыйаатыр туһунан эрэ буолбакка калмык норуотун устуоруйатын, билиҥҥэ диэри тыйаатыр искусствота хайдах сайдан кэлбитин киэҥник сырдаттылар. Борис Манджиев Былатыан Ойуунускай аатынан Саха тыйаатыра Арассыыйа национальнай тыйаатырдарыгар Европаҕа, ол аата аан дойду тыйаатырын эйгэтигэр түннүгү аспыт тыйаатырынан буолар диэн үрдүктүк сыаналаата. Кини бу гостуруол бырагыраамата калмык норуотун олоҕун сырдатар сыаллааҕын тоһоҕолоон бэлиэтээтэ. Тыйаатыр дириэктэрэ Галина Шураева гостуруол бырагыраамата баар буолан тыйаатыр национальнай өрөспүүбүлүкэлэргэ, атын эрэгийиэннэргэ ыалдьыттыыр кыахтаммыттарыттан астыналларын уонна маннык хардарыта гостуруоллар норуоттар доҕордоһууларын күүһүрдэрин бэлиэтээтэ. Сергей Бурлаченко Национальнай тыйаатырдарыгар саҥа эдэр күүс эһиилгэттэн эбиллээри турарын, Москваҕа Б.Щукин аатынан театральнай институкка 12 эдэр дьон артыыс үөрэҕэр ситиһиилээхтик үөрэнэ сылдьарын, тыйаатыр репертуарын туһунан сиһилии кэпсээтэ.
Саха тыйаатыра Борис Манджиевы 1992 сыллаахтан, биһиэхэ кэлэн Мольер “Ыскапыан албастара” испэктээкилин туруоруоҕуттан үчүгэйдик билэр. Ол да буоллар, кинини драматург быһыытынан билбэт эбиппит. Бу гостуруолга көрдөрөр «Я-Будда” диэн философскай ис хооонноох, “Араш” диэн калмыкия норуотун көһөрүүтүн, “Калмыкская свадьба” диэн муусуканан испэктээкиллэри кини туруорбут эрэ буолбакка, пьесаларын эмиэ бэйэтэ уонна суруйааччы Виктор Хаптахановтыын суруйбутун сөҕө иһиттибит.
Надежда Осипова.
РФ Силиэстийэлиир кэмитиэтэ Саха сиригэр Алдан куоракка саахалланар туруктаах дьиэ олохтоохторун өр кэмҥэ көһөрбөтөх чахчытынан…
Косметологическай килииньикэлэр килийиэннэрэ төлөөбүт өҥөлөрүн сыанатыттан 13% нолуоктан вычет төлөбүрүн ылыахтарын сөп. Ол эрээри, бу…
Бүгүн Чурапчы Болтоҥотугар быһыт тоҕо барбытынан, таатталарга «муускутун суһаллык харайыа этигит» диэн ис хоһоонноох биллэрии…
Бүгүн III Өрөспүүбүлүкэтээҕи «Норуот уонна аармыйа - биир сомоҕо» Фашизмы утары пуорум чэрчитинэн «Арассыыйа –…
Ленскэйтэн төрүттээх Елизавета Дерменжи киокусинкайга Аан дойду Куубагар үс бастыҥ иһигэр киирэн, боруонса мэтээл кыайыылааҕынан…
Норуот сомоҕолоһуутун күнүгэр Дьокуускайга А.Е. Кулаковскай аатынан Норуоттар доҕордоһууларын дьиэтин былаһааккатыгар сыл аайы ыытыллар «Улахан…