Саха сиригэр кэлэр нэдиэлэҕэ тымныйыа

Сотору кэминэн сорох улуустарга салгын температурата -50 кыраадыска диэри түһүө.

Бу нэдиэлэ бүтүөр диэри Саха сирин үгүс өттүгэр циклон сабыдыалынан сылаас туруо. Ол гынан баран, кэлэр нэдиэлэттэн өрөспүүбүлүкэ бары кэриэтэ улуустарыгар тымныйара күүтүллэр.

Ол туһунан Саха сиринээҕи гидрометсулууспатын начаалынньыгын солбуйааччы Татьяна Маршалик СИА-ҕа кэпсээтэ: «Билигин биһиэхэ өрөспүүбүлүкэ соҕуруулуу-арҕаа уонна арҕаа өттүгэр балачча сылаас. Красноярскай кыраай циклона ааһар. Ол Мииринэй, Ленскэй уонна Нерюнгри оройуоннарыгар сабыдыаллыыр. Нэдиэлэ бүтүүтэ салгын температурата өрөспүүбүлүкэ бары улуустарыгар намтыа. -50 кыраадыстаах тымныылар бу күннэргэ Өймөкөөн уонна Томпо улуустарыгар, ол кэннэ илин эҥэргэ түһүөхтэрэ», — диэтэ Татьяна Маршалик. Кини бэлиэтээбитинэн, кэлэр нэдиэлэ Саха сирин бары улуустарыгар тымныйыа. Халлаан туруга олунньу 12 күнүн чугаһыгар уларыйыа диэн билгэлииллэр.

Саха сиринээҕи гидрометсулууспа иһитиннэрэринэн, чугастааҕы сууккаҕа арҕаа, соҕуруулуу-арҕаа, соҕуруулуу-илин, хотугулуу-илин өттүгэр, өрөспүүбүлүкэ киинигэр кыралаан хаар түһүө. Илин эҥэр улуустарыгар түүнүн -41-46, күнүһүн -33-38, арҕаа түүнүн -32-37, күнүһүн -29 -34, хотугулуу-арҕаа уонна миэстэтинэн хотугулуу-илин түүн -48-53, күнүһүн -43-48. Өрөспүүбүлүкэ соҕуруу уонна соҕуруулуу-арҕаа өттүгэр сылаас, түүнүн салгын температурата -22-27 кыраадыс, онтон күнүһүн -19 кыраадыска диэри сылыйыаҕа. Субуотаҕа Дьокуускай куоракка кыралаан хаардыа. Күнүскү температура -31-33 кыраадыс буолуо.

СИА сайтыттан