Саха сиригэр коронавирус тарҕаныытынан сибээстээн биллэриллибит үрдүк бэлэмнээх буолуу эрэсиимин тохтоттулар

Ил Дархан Айсен Николаев 2023 сыл ыам ыйын 12 күнүгэр коронавирус тарҕаныытынан сибээстээн Саха Өрөспүүбүлүкэтигэр сэрэтэр уонна ыксаллаах быһыыны туоратар үрдүк бэлэмнээх буолуу эрэсиимин тохтотор туһунан ыйаахха илии баттаата.

Докумуону Саха Өрөспүүбүлүкэтин кылаабынай судаарыстыбаннай санитарнай бырааһа өрөспүүбүлүкэҕэ коронавируһунан ыалдьар дьон ахсаана аҕыйаабытынан, нэһилиэнньэ уонна ыарыыга ылларыан сөптөөх дьон ортотугар кэлэктиибинэн иммунитет ситиһиллибитинэн, үрдүк таһымнааҕынан сибээстээн эппит этиитин учуоттаан ылылынна.

Ураты бэлэмнээх буолуу эрэсиимэ биллэриллибит кэмигэр Саха сиригэр барыта коронавируһунан ыалдьыы 225 534 түгэнэ бэлиэтэммит. Ыарыыны сэрэтэр инниттэн 727 120 киһи быһыыны ылбыт, 2 843 487 тест оҥорбуттар. Туһааннаах ыйаах илии баттаныаҕыттан күүһүгэр киирдэ.