Саха сиригэр “Крым сааһын” курдук
![](https://sakha-sire.ru/wp-content/uploads/2023/03/krym5-e1679110025762-900x596.jpg)
Бүгүн, кулун тутар 18 күнүгэр, Крым Арассыыйа Федерациятын кытта холбоһуутугар анаммыт сибэкки дьөрбөтүн ууруу сиэрэ-туома Кыайыы болуоссатыгар ыытылынна.
Крым олохтоохторо модун Арассыыйаҕа холбоһор туһугар 2014 сыллаахха 97 бырыһыан куоластарын биэрэн, референдумҥа дьиҥнээх патриотизм, хорсун буолуу холобурун көрдөрбүттэрэ.
Дьокуускай куоракка дьоруой-куорат Севастопольга анаммыт өйдөбүнньүк билиитэ таһыгар Волонтердар ресурснай кииннэрин, “Эдэр гвардия” чилиэннэрэ, бэтэрээннэр, ыччаттар, устудьуоннар, Дьокуускай куорат олохтоохторо уо.д.а. муһуннулар. Кинилэр бары илиилэригэр гвоздиканы, роза сибэккини туппуттар.
Үөрүүлээх миитини СӨ Ил Дарханын уонна СӨ Бырабыыталыстыбатын Дьаһалтатын салайааччыта Георгий Михайлов арыйда уонна тыл эттэ.
— Биһиги быйыл тохсус төгүлүн Крым Арассыыйаны кытта холбоһуутун бэлиэтиибит. Онон өрөспүүбүлүкэ салалтатын аатыттан бу бэлиэ күнүнэн эҕэрдэлиибин. Крым Арассыыйаҕа холбоһуутугар анаммыт тэрээһиннэр өрөспүүбүлүкэҕэ ыытыллыбыттара хас да хонно. Оройуоннарга бу бэлиэ даатаҕа эмиэ тэрээһиннэр буоллулар. Дьоруой-куорат Севастополь өйдөбүнньүк тааһын аттыгар туран, биһиги дойдубут бу уустук кэмҥэ түмсүүлээх буолуута олус суолталааҕын бэлиэтиибит, — диэтэ Георгий Николаевич. Кини салгыы Саха сирэ Крымы кытта ситимнээх бэлиэ историческай түгэннэрин тоһоҕолоон бэлиэтээтэ. Ол курдук, Саха казактарын полкатыттан саҕалаан Аҕа дойду Улуу сэриитигэр биһиги биир дойдулаахтарбыт Севастополь куораты көмүскээһиҥҥэ кыттыбыттарынан киэн туттан туран ахтыбытын эдэр ыччат улаханнык долгуйан, сэргээн иһиттэ.
Салгыы Дьокуускай куорат баһылыга Евгений Григорьев тыл эттэ. Кини эмиэ Крым уона Севастополь Арассыыйаҕа холбоһууларын историческай түгэн быһыытынна сыаналаата. “Дьокуускай уонна Крым, Дьокуускай уонна Севастополь” диэн холобурдаан эттэ. 1944 с. Аҕа дойду сэриитин кэмигэр Саха сирин 2000 олохтооҕо Крымы босхолооһуҥҥа кыттыбытын, 100 тахса киһи онно көмүс уҥуоҕа кистэнэн сытарын туһунан аҕынна.
“Саха сиригэр нуучча общината”, “Народный фронт за Россию” түмсүүлэр салайааччылара кытыннылар. “Боотур” этэрээт хамандыыра Александр Колесов тыл этиитин билиҥҥи балаһыанньаны кытта ситимнээтэ. Онон бүгүн Кыайыы болуоссатыгар историческай суолталаах бэлиэ түгэн буолан ааста.
Дьоруой-куорат Севастополь өйдөбүнньүк билиитэтигэр сүгүрүйэн туран, өрөспүүбүлүкэ Ил Дарханын уонна СӨ Бырабыыталыстыбатын Дьаһалтатын салайааччыта Георгий Михайлов сибэкки дьөрбөтүн уурбутун кэннэ, мустубут дьон биирдии-биирдии кэлэн ууран истилэр. Бу бэлиэ күнү өйдөөн-санаан аастылар. Онон Саха сиригэр даҕаны “Крым сааһын” курдук буолла. Күн-дьыл да туран биэрдэ.
![](https://sakha-sire.ru/wp-content/uploads/2023/03/krym1.jpg)
![](https://sakha-sire.ru/wp-content/uploads/2023/03/krym-2.jpg)
![](https://sakha-sire.ru/wp-content/uploads/2023/03/krym3.jpg)
![](https://sakha-sire.ru/wp-content/uploads/2023/03/krym4.jpg)
![](https://sakha-sire.ru/wp-content/uploads/2023/03/krym6.jpg)
![](https://sakha-sire.ru/wp-content/uploads/2023/03/krym7.jpg)
![](https://sakha-sire.ru/wp-content/uploads/2023/03/krym7-1.jpg)
![](https://sakha-sire.ru/wp-content/uploads/2023/03/krym8.jpg)
![](https://sakha-sire.ru/wp-content/uploads/2023/03/krym9.jpg)
Сообщить об опечатке
Текст, который будет отправлен нашим редакторам: