Салгыы
Саха сиригэр кубалар, туруйалар кэллилэр

Саха сиригэр кубалар, туруйалар кэллилэр

13.04.2024, 12:49
Хаартыска: СИА.
Бөлөххө киир:

Сандал сааспыт салаллан, Саха сиригэр улахан көтөрдөр эргиллэн кэлитэлээн эрэллэр. Онно-манна кубалары, туруйалары көрбүттэр диэн кэпсээннэр, видеоҕа устуулар тарҕаналлар. Бастаан кэлбит буоллаҕына, оннооҕор тураах күндүркэйэн көстөр буоллаҕа.

Хаартыска: Сахалайф.

Аҕыйах хонуктааҕыта Пеледуй бөһүөлэгин аттынан кылбаа маҥан кубалар үөрдэрэ көтөн ааспытын видеоҕа устубуттар этэ. Маҥан хаар үрдүнэн муус маҥан кубалар эргийэ көтө сылдьаллара кэрэ да көстүү буоллаҕа. Уу-хаар тахса, күөллэр муустара уулла илигинэ кэлэллэрэ — дьыл эрдэлиирин бэлиэтэ дуу?

Сунтаар Кириэстээҕэр номнуо кустары көрбүттэрин, хаартыскаҕа түһэрбиттэрин кэпсииллэр. Дьэ, булчуттар истэрэ кычыгыланан эрдэҕэ…

Аммаҕа туруйалар көтөн кэлбиттэрин эмиэ устубуттара. Ону тэҥэ, Амма улууһун Сатаҕай бөһүөлэгэр баар күөлгэ  соҕотох куба түспүтүн устубут видеолара тарҕаммыта.

Хаартыска- Сахалайф.

Бүгүн Амма-Сулҕаччы лииньийэтигэр саахал тахсан, Амма улууһун үгүс нэһилиэктэригэр уот суох. Уот бардаҕына, МТС, «Билайн» суотабай сибээстэрэ тута арахсар. Ол да буоллар, «Мегафон» үлэлиир буолан, Сатаҕай оскуолатын дириэктэрэ Иванна Шишигинаҕа эрийэн тиийдибит.

— Бу соҕотох куба бөһүөлэк аттыгар баар. Ортоку Элгээн диэн кыра күөлгэ түспүт. Ону алын сүһүөх кылаас учуутала Степанида Яковлева видеоҕа устан, ыыппыта, тарҕаммыт эбит. Кини күөл аттыгар олорор. Бу соҕотох куба үс сыллааҕыта эмиэ бу күөлгэ кэлэн түһэ сылдьыбыта. Бүгүн куба суох, барбыт, — диэн кини кэпсээтэ.

Куба доҕорун сүтэрдэҕинэ, атыны көрдөөбөт. Доҕорун кэриэстээн, сэттэ сыл устата бииргэ сылдьыбыт, уйаламмыт сирдэринэн кэрийэн барар диэн өйдөбүл баар. Куба Кыһыл кинигэҕэ киирбит ытык көтөр.

+1
8
+1
0
+1
1
+1
0
+1
0
+1
0
+1
0
Бары сонуннар
Салгыы
26 мая
  • 19°C
  • Ощущается: 18°Влажность: 26% Скорость ветра: 2 м/с

Сообщить об опечатке

Текст, который будет отправлен нашим редакторам: