Саха сиригэр Курскай олохтоохторугар көмө аахсыйата саҕаланна

Бүгүн, ыам ыйын 16 күнүгэр, Саха сиригэр «Юбилейный маршрут добра» диэн аахсыйа саҕаланна. Бу туһунан суһал ыстаап «Вместе к Победе!» Координационнай киинин салайааччыта Георгий Куркутов иһитиннэрдэ.

Бу туһунан СӨ Ил Дарханын уонна бырабыыталыстыбатын пресс-сулууспата суруйар.
Аахсыйа бэс ыйын 21 күнүгэр бэлиэтэнэр тырааныспыр хампаанньата 20 сыллаах үбүлүөйүгэр «Аямтрансервис» көҕүлээбитин бэлиэтээтэ.

«Үбүлүөй бырааһынньыгын оннугар тырааныспар хампаанньата үтүө дьыалаҕа болҕомтотун ууран, Украина боевиктарын содулларыттан эмсэҕэлээбиттэргэ 120 туонна гуманитарнай таһаҕаһы ыытарга быһаарыы ылынна. Көмө Курскай уобаласка ыытыллыаҕа», — диэтэ Георгий Куркутов. Бу аахсыйаны тэрийээччилэринэн «Кыайыыга тэҥҥэ» судаарыстыбаннай хамыыһыйа, «Биир Ньыгыл Арассыыйа» баартыйа, Хотугулуу- Илиҥҥи көмө уонна өйөбүл пуондата, «Мы Вместе!» волонтер ыстааба. Саха сирин олохтоохторо мэдиссиинэ табаардарын, эми-тому, таҥаһы, хаһаайыстыбаннай табаардары, о.д.а. хомуйан, көмө оҥоруохтарын сөп. Гуманитарнай көмөнү хомуйуу бэс ыйын 10 күнүгэр диэри ыытыллыаҕа.

Гуманитарнай көмөнү туттарыахха сөп: Бестужев-Марлинскай уулусса,5/1 («Якутия с тобой» киин, +7-924-597-19-65); Короленко уулусса, 6 («ДоброVольцы» киин, +7-914-274-88-00); Дзержинскай уулусса, 13 (Оҕо айымньытын дьиэтэ, +7-914-225-27-36); Дзержинскай уулусса, 62 («Боевые шелкопряды Якутии» түмсүү, +7-924-170-22-42). Ону таһынан муниципальнай оройуоннарынан уонна да атын волонтерскай былаһааккаларынан көмөнү хомуйуу пууннара үлэлииллэр.