Саха сиригэр Кыайыы күнүгэр — “Өлбөт үйэлээх полк”

Аҕа дойду Улуу сэриитигэр Кыайыы 80 сылынан “Өлбөт үйэлээх полк” хаамсыы ыам ыйын 9 күнүгэр Саха сирин бары улуустарыгар ыытыллыаҕа.

Дьокуускайга “Өлбөт үйэлээх полк” Хабаров уулуссатыгар буоларын туһунан “Арассыыйа өлбөт үйэлээх полката” Бүтүн Арассыыйатааҕы гражданскай-патриотическай хамсааһын  эрэгийиэннээҕи отделениета иһитиннэрдэ.

Патриотическай аахсыйа кыттааччылара Хабаров аатынан уулуссаҕа Гавриил Чиряев аатынан искибиэргэ, Ленин проспегар IT-паарка таһыгар, Ярославскай аатынан уулуссаҕа “Проспект” маҕаһыын таһыгар мустуохтара. Хаамыы 13.00 чаастан Кыайыы болуоссатыттан саҕаланыаҕа. Массыына суола сарсыарда 8 чаастан тохтотуллуоҕа. Онуоха  Хабаров уулуссата бүтүннүү сабыллыаҕа.  Богдан Чижик аатынан уулусса сорҕотугар Федор Попов уулуссатын кытары охсуһууга тырааныспар сылдьыыта хааччахтаныаҕа. Хабаров уулуссатыгар ааһарга үс хонтуруолллуур-ыытар пуун үлэлиэҕэ (Ленин уулуссатыгар, үөрэҕи сайыннарар институт оройуонугар, Саха сиригэр бэлитиичэскэй сыылка устуоруйатын мусуой-дьиэтин оройуонугар Суорун Омоллоон уонна Ярославскай уулуссаларга).

Богатырев уулуссатыгар хаартыскаҕа түһэр зона, сэбиэскэй кэм массыыналарын быыстапката уонна хонуу куукуата үлэлиэхтэрэ.