Саха сиригэр сүрүн кыһыҥҥы суоллар ахсынньыга аһыллыахтара

Саха сиригэр сүрүн кыһыҥҥы суоллар ахсынньыга аһыллыахтара. Ый бастакы дэкээдэтигэр Өлүс өрүскэ Хатас – Павловскай хайысханан кыһыҥҥы суолу үлэлэтиэхтэрэ, диэн Тырааныспар министиэристибэтэ иһитиннэрэр.

Алдан өрүһү Хаандыга – Мэҥэ Алдан хайысхатынан тырааныспар сырыыта ахсынньы 1 күнүттэн саҕаланыа. Бу күннэргэ Бүлүү өрүскэ  4 туоннаҕа диэри ыйааһыннаах массыыналарга сырыы көҥүллэниэ.

Дьокуускай – Аллараа Бэстээх хайысханан кыһыҥҥы суол эһиил тохсунньу 5 күнүттэн аһыллыаҕа.

Кыһыҥҥы суоллар аһыллар болдьохторо сабаҕаланар уонна килиимэт усулуобуйатыттан, муус туругуттан тутулуктаах буолуоҕа диэн исписэлиистэр чуолкайдыыллар. Билиҥҥи туругунан, бары кыһыҥҥы суолларга киирии суоллары тэрийэн оҥоруу үлэтэ ыытыллар.

Кыһыҥҥы суоллар официальнайдык аһыллыахтарыгар диэри мууска тахсыы кытаанахтык бобуллар. Ирдэбили кэһии иһин административнай эппиэтинэс көрүллэр. Ыстараап кээмэйэ: гражданнарга – 3-тэн 5 тыһыынчаҕа диэри солкуобай, дуоһунастаах сирэйдэргэ – 20-тэн 50 тыһыынчаҕа диэри солкуобай, юридическай сирэйдэргэ – 100 тыһыынчаттан 1 мөлүйүөн солкуобайга диэри.