Саха сиригэр кылаас салайааччыларын пуорума саҕаланна

Бүгүн, ахсынньы  4 күнүгэр, “Классное руководство — ядро единого образовательного пространства” кылаас салайааччыларын өрөспүүбүлүкэтээҕи бастакы пуорума саҕаланна.

Пуорумҥа муниципальнай, эрэгийиэннээҕи, Бүтүн Арассыыйатааҕы идэ куонкурустарыгар кыайыылаах, призер, лауреат буолбут кылаас салайааччылара кытталлар.

2024 сыл ахсынньы 4-5 күннэригэр ыытыллар пуорум пленарнай мунньахтаах, ырытыһар былаһааккалардаах, бырайыактыыр секциялардаах, маастар-кылаастардаах.

Маны сэргэ пуорум кэмигэр “Ыал уонна патриотизм” диэн научнай-практическай кэмпириэнсийэ буолуоҕа.

Секцияларга Дьиэ кэргэн сылыгар бастыҥ педагогическай ыаллары уонна династиялары, ыал үлэҕэ албан аатын сырдатыахтара, үөрэтии ньымаларын кэпсэтиэхтэрэ.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата