Саха сиригэр кырыыса элбээтэ

Саха сирин олохтоохторо кутуйах, кырыыса аһары элбээбитин туһунан үҥсэллэр. Онон сибээстээн өрөспүүбүлүкэ тэрилтэлэрэ бу кыыллары имири эһэр туһунан тэрээһиннэри ыытыы туһунан  сорук туруорбуттар.

Ылыныллыбыт миэрэлэр отчуоттарын ахсынньы 1 күнүгэр диэри Саха сирин Гигиенатын уонна эпидемиологиятын киинигэр тиэрдэр туһунан иһитиннэрбиттэр.  Ол курдук ыарыыны, инфекцияны тарҕатар кутуйахтары, кырыысалары утары үлэ атырдьах ыйын 15 күнүттэн сэтинньи 15 күнүгэр диэри ыытыллар. Роспотребнадзор иһитиннэрбитинэн, эрэгийиэҥҥэ дератизационнай үлэлэр ыытыллыбыттарын да кэнниттэн олохтоохтортон үҥсүү киирэр эбит. Салгыы бу кыыллар аһары элбээтэхтэринэ сыстыганнаах ыарыы ахсаана үрдүүр кутталлаах, ону таһынан  экэниэмикэҕэ уонна олох хаачыстыбата мөлтүүрүгэр эмиэ дьайар.

Эрдэ Нерюнгрига кырыысалар үөдүйбүттэрин туһунан СИА суруйан турар. Кырыысалар элбэх буолан бөх кутар баахтар тастарыгар мустуулара дьону дьиксиннэрэр эбит. Оттон үгүс олохтоохтор кырыысалары дьиэлэрин иһигэр кытта көрөллөр эбит.