Саха сиригэр Кытай Норуодунай Өрөспүүбүлүкэтин дэлэгээссийэтэ кэлиэҕэ

Кытай Норуодунай Өрөспүүбүлүкэтин Хэйлунцзян провинциятын Цзямусы куоратын атыы-экэнэмиичэскэй үлэлэһии Управлениетын дириэктэрин солбуйааччы Цзямусы Ван Няньсен салалталаах дэлэгээссийэтэ атырдьах ыйын 14-17 күннэригэр Дьокуускайга кэлэрэ күүтүллэр.

Көрсүһүү чэрчитинэн Кытай дэлэгээссийэтэ  Өрөспүүбүлүкэ инвестицияларын тардыыга уонна экспорка өйөбүлүн туһунан ааҕыныстыбаны, эрэгийиэн бөдөҥ тэрилтэлэрэ, урбаан, атыы-эргиэн уонна туризм министиэристибэтин, Саха сирин атыы-бырамыысыланнай палаататын, бырамыысыланнас уонна геология, ону сэргэ тас сибээс уонна өрөспүүбүлүкэ норуоттарын дьыалаларын министиэристибэтин кытта официальнай көрсүһүүлэр буолуохтара.

Өрүттэр икки өттүттэн үлэлэһии туһунан кэпсэтиэхтэрэ.

Цзямусы –Хэйлунцзян  Илин провинциятын префектура таһымнаах куората буолар.   Сунхуа өрүс орто уонна аллараа сүүрүгүн кыйа сытар.

Бүгүҥҥү күҥҥэ  өрөспүүбүлүкэ 19 муниципальнай тэриллиитэ  Хэйлунцзян провинциятын 23 куоратын кытта убайдыы-бырааттыы сыһыаны тутар.

Бэлиэтээн эттэххэ, бу сыл ыам ыйыгар өрөспүүбүлүкэ баһылыга  Айсен Николаев РФ бэрэсидьиэнэ Владимир Путин салалталаах официальнай дэлэгээссийэ састаабыгар киирэн  Кытай Норуодунай Өрөспүүбүлүкэтигэр сылдьыбыта.

Судаарыстыба баһылыктара икки өттүттэн үлэлэһии уонна норуоттар икки ардыларынааҕы уонна эрэгийиэннээҕи кыһалҕалары кэпсэтиспиттэрэ.

Көрсүһүү түмүгүнэн, Владимир Путин уонна Си Цзиньпин сыһыаны тупсарыы туһунан кыттыгас сайабылыанньаҕа илии баттаспыттара. РФ бэрэсидьиэнэ Владимир Путин Кытай спортсменнарын Дьокуускайга буолуохтаах норуоттар икки ардыларынааҕы «Азия оҕолоро» успуорт оонньууларыгар кыттарга ыҥырбыта.

2023 сыл түмүгүнэн Кытай тас атыы-эргиэн өттүгэр бөдөҥ партнер быһыытынан буолар. Ааспыт сыл түмүгүнэн, Кытай уонна Саха сирэ тас атыы-эргиэн оборуота  2,6 млрд. АХШ дуолларыгар тэҥнэспит.