Саха сиригэр кытай урбаанньыттарын биисинэс-миссиялара саҕаланна

Сэтинньи 29 күнүттэн Саха сиригэр Кытай Норуодунай Өрөспүүбүлүкэтин урбаанньыттарын  дьыалабыай миссиялара саҕаланыаҕа диэн СӨ Тас сибээскэ уонна норуоттар дьыалаларыгар министиэристибэтэ иһитиннэрдэ.

Дьокуускайга Huanfa International, Heihe Ciyido Economic and Trade Co., Ltd. уонна Хэйлунцзян Dongzhu Creative Design Co., Ltd хампаанньаларын салайааччылара кэллилэр.

Муода индустриятынан дьарыктанар кытай тэрилтэлэрэ Саха сириттэн дизайнерскай таҥаһы, сэлии уҥуоҕун, түүлээҕи, күндү таастары, ювелирнай оҥоһуктары атыылыыр интэриэстээхтэр.

Кытайтан сылдьар урбаанньыттарга анаан Дьокуускайга ахсынньы 3 күнүгэр Үлэ кыбартаалын резиденнэрин кытта бииргэ «Креативная Якутия» дизайнердарын оҥоһуктарын көрдөрүү буолуоҕа.

Тэрээһиҥҥэ Саха сирин 12 экспорка хайысхалаах дьоҕус, орто урбаан тэрилтэлэрэ кыттыахтара. КНӨ дьыалабыай эргимтэтин биисинэс-миссията ахсынньы 4 күнүгэр диэри салҕаныаҕа”, — диэтилэр министиэристибэҕэ.