Саха сиригэр күүстээх самыыртан «Амма» суолугар айан-сырыы уустугурда

Күүстээх самыыр түмүгэр «Амма» суол сорох сирдэринэн суол туруга мөлтөөтө. Бэдэрээтчит тэрилтэ — «СУ-77» ХЭУо түргэн үлэтин түмүгэр айан-сырыы кылгас кэм иһигэр толору сөргүтүлүннэ. Бу туһунан Саха сиринээҕи айан суолларын управлениета иһитиннэрдэ.

От ыйын 27 күнүгэр суол 74-с км биир бөдөҥ таһаҕас тиэйэр массыыната суол мөлтөөбүт сиригэр батыллан, кылгас кэмҥэ суолу бүөлээбит. Бэдэрээтчит саахалы суох гынар, чөлүгэр түһэрэр биригээдэтэ айаны сөргүтэргэ суһал дьаһаллары ылынна. Уустук учаастактарга үлэ тохтоло суох баран, бэдэрээтчит тиэхиньикэ уонна үлэһиттэр суукканы быһа дьуһуурустубаларын тэрийдэ. Автогрейдер, самосвал, погрузчик уонна экскаватор бэлэм тураллар. Наада буоллаҕына, бу тиэхиньикэлэр айаҥҥа мэһэйдэри суһаллык туоратыыга үлэлииллэр диэн иһитиннэриигэ этиллэр. Саха сиринээҕи айан суолларын управлениета  өрөспүүбүлүкэтээҕи суоллар туруктарын кэтээн көрүүнү салгыыр уонна суоппардары айаннарын былаанныылларыгар сэрэхтээх буолалларыгар, быраабыланы тутуһалларыгар, күн-дьыл уонна суол туругун учуоттуулларыгар ыҥырар.