Саха сиригэр «Люди Победы» саҥа бырайыак үлэлээтэ

Олунньу 23 күнүгэр, Аҕа дойдуну көмүскээччи күнүгэр, «Саха» НКИХ «Кыайыы дьоно»/«Люди Победы» саҥа бырайыагы үлэлэттэ. Бу электроннай архыып Аҕа дойду Улуу сэриитин кыттыылаахтарын устуоруйаларынан уонна хаартыскаларынан толоруллар.

«Саха» НКИХ генеральнай дириэктэрэ Олег Марков бырайыак фронтовиктар тустарынан өйдөбүнньүгү үйэтитиигэ ананар диэн бэлиэтээтэ.

«Биһиги дьоруойдар ааттарын үйэтитиигэ эрэ буолбакка, устуоруйаларын сырдатарга дьулуһабыт. Хас биирдии буойун дьылҕата ураты уһулуччулаах, онон кэлэр көлүөнэлэргэ анаан Ийэ дойдуларын көмүскүүр дьон хорсун быһыыларын үйэтитэрбит сүдү суолталаах». – диэтэ кини.

Бырайыакка ким баҕалаах кыттыан сөп. Сэриигэ кыттыбыт аймахтаргыт эбэтэр билэр дьоҥҥут туһунан матырыйааллар баар буоллахтарына, эһиги кинилэр биографияларынан уонна хаартыскаларынан үллэстиэххитин сөп. Ити устуоруйа сыаналаах страницаларын үйэтитиигэ көмөлүүр.

Сиһилии бу сигэнэ билсиэххитин сөп: https://pobedanvk.ru