Саха сиригэр «Манчаары оонньууларын» гимнин таллылар

Саха сиригэр «Манчаары оонньуулара» успуорт национальнай көрүҥнэригэр ХХІ спартакиада гимнин суруйууга аһаҕас куонкурус түмүгүн таһаардылар.

Мелодия бастыҥ ааптарынан Дьокуускайдааҕы «Айар уустар» креативнай индустрия кэллиэһин I кууруһун устудьуона Ариана Решетникова ааттанна. Тиэкис суруйуутун ааптардарыгар кыайыылааҕынан «ОДО» этно—комплекс дириэктэрин солбуйааччы Дьулустаан Толстяков буолла.

Кыайыылаахтар хас биирдии бырайыакка тиэкис, гимн мелодиятыгар дипломнарынан, 20 тыһыынча солкуобайдаах харчынан бириэмийэлэри тутуохтара. Куонкурус икки түһүмэҕинэн ыытылынна: тиэкиһи оҥорууга, ол кэннэ мелодияны суруйууга.

Барыта 24 литэрэтииринэй тиэкис киирбититтэн, финалга хамыыһыйа быһаарыытынан сэттэ үлэ талыллыбыт. Оттон иккис түһүмэххэ 19 үлэ киирбит. Култуураҕа уонна духуобунай сайдыыга миниистирин бастакы солбуйааччы Мария Турантаева бэрэссэдээтэллээх хамыыһыйа чилиэннэрэ киирбит композициялары барытын истэн, туруоруллубут киритиэрийдэргэ сөп түбэһиннэрэн, куоластааһыны ыыттылар. Таатта улууһугар XXII спартакиада от ыйын 7-12 күннэригэр ыытыллар.