Муниципальнай сулууспаҕа үлэҕэ ылыы бэрээдэгэ судургутуйуо

Ил Түмэҥҥэ муниципальнай сулууспа туһунан сокуоҥҥа көннөрүүлэри киллэрэр сокуон барылын бэлэмнээтилэр. Парламеҥҥа СӨ Бырабыыталыстыбата  киллэрбит сокуон барыла пленарнай мунньахха көрүллүөҕэ.

Докумуон Ил Түмэн саайтыгар таҕыста. Арассыыйа Бэрэсидьиэнин сорудаҕынан оҥоһуллубут докумуон байыаннай дьайыы кыттыылаахтарыгар муниципальнай сулууспаҕа үлэҕэ ылыыга ирдэбиллэри судургутутар. Ол курдук, тыа сирин нэһилиэктэригэр дуоһунастаах үлэҕэ ыларга үөрэх таһымын ирдэбиллэрэ намтыыллар, ону таһынан быраабыланан ирдэнэр сулууспа эбэтэр үлэ ыстаастара кылгатыллар.

Сокуон барылын быһаарыы суругар ыйыллыбытынан, муниципальнай тэриллиилэргэ байыаннай дьайыы кыттыылаахтарын муниципальнай сулууспаҕа киллэрэргэ сөптөөх усулуобуйа тэриллэр. Ол иһигэр, муниципальнай сулууспа ыстааһыгар эбэтэр идэтинэн, бэлэмнэнии хайысхатынан үлэҕэ, ону тэҥэ үөрэх таһымыгар квалификация ирдэбиллэригэр көннөрүү киирэр. Оччотугар муниципальнай сулууспаҕа үлэҕэ ылыы ахсаана үрдүүрэ күүтүллэр, ол иһигэр байыаннай дьайыы кыттыылаахтарын тардар инниттэн наадалаах усулуобуйа тэриллэр. Маны таһынан муниципальнай сулууспаҕа кылаастаах чыыннарын иҥэрэргэ байыаннай уонна анал сыбаанньалар, атын судаарыстыбаннай сулууспа кылаастаах чыыннара учуоттаныахтара. Оттон судаарыстыбаннай гражданскай сулууспаҕа курдук, квалификациялаах эксээмэн түмүгүнэн кылаастаах чыыннары иҥэрии тохтотуллар.