Саха сиригэр «Музыкальный семестр мира и дружбы» бырайыак саҕаланна

Бу күннэргэ Саха сиригэр өрөспүүбүлүкэ музыкальнай диэйэтэллэрин сойууһа тэрийиитинэн «Музыкальный семестр мира и дружбы» бырайыак саҕаланна.

Бырайыак устудьуоннарга туһуланар уонна үөрэх семестиригэр 10 кэнсиэри ыытарга былааннанар диэн СӨ Култууратын уонна духуобунай сайдыытын министиэристибэтэ иһитиннэрэр. Бу көҕүлээһин 2024 сылга Ил Дархан гранын куонкуруһугар кыайбыта. Кэнсиэргэ сылдьар устудьуоннары анал электроннай учуот кинигэтигэр бэлиэтиэхтэрэ. Семестр бүтүүтүгэр 10 кэнсиэргэ барытыгар сылдьыбыт устудьуоннар ортолоругар сүүйүүлээх оонньуу ыытыллыаҕа. Кыайыылаах уон устудьуон Эпос уонна искусство Арктикатааҕы киинигэр баар Г.М. Кривошапко аатынан Саха сирин судаарыстыбаннай филармониятын саҥа акустическай саалатыгар ыытыллар тэрээһиннэргэ босхо сылдьарга сыллааҕы абонеменнары ылыахтара.

Семестр устата уон кэнсиэргэ сылдьыбыт устудьуон сүрүн бириискэ – Санкт-Петербург куоракка барарга путевкаҕа тиксиэн сөп. Ол иһигэр Мариинскай тыйаатырга, Санкт-Петербургдааҕы филармонияҕа, Эрмитажка уонна Нуучча түмэлигэр сылдьыы баар.