Саха сиригэр национальнай бырайыактарынан 12 эбийиэк үлэҕэ киирдэ

Ил Дархан Айсен Николаев өрөспүүбүлүкэ араас куораттарыгар уонна оройуоннарыгар тутуллубут 12 бөдөҥ социальнай уонна инфраструктурнай суолталаах эбийиэктэри национальнай бырайыактар уонна эрэгийиэннээҕи судаарыстыбаннай бырагыраамалар чэрчитинэн видеосибээһинэн үлэҕэ киллэрдэ.

Бүгүн, кулун тутар 12 күнүгэр, саҥа поликлиника, балыыһа, ОДьКХ эбийиэктэрэ, хаарбах дьиэлэртэн көһөрүү бырагырааматынан тутуллубут элбэх кыбартыыралаах дьиэлэр, ону тэҥэ 4 үөрэх эбийиэктэрэ үлэҕэ киирдилэр. Оскуола уонна оҕо уһуйаанын дьиэлэрэ 2019 сылга дойду Бэрэсидьиэнэ Владимир Путин көҕүлээбит «Үөрэхтээһин» национальнай бырайыак чэрчитинэн өрөспүүбүлүкэ инвестиционнай бырагырааматынан тутуллуннулар. Бырагыраама бу сыллар тухары билиҥҥэ диэри көдьүүстээҕин дакаастаата.

Аллайыаха Чокурдааҕар 275 миэстэлээх оскуола аһылынна. Эбээн-Бытантай Баатаҕай Алыытыгар 220 миэстэлээх саҥа оскуола үлэҕэ киирдэ. Амма Абаҕатыгар оскуола-оҕо уһуйаана 150 уонна 75 миэстэлээх үлэлээтэ. Кэбээйи Сайылыгар 275 миэстэлээх оскуола аанын астылар, оттон Таатта Туора Күөлүгэр 50 миэстэлээх оҕо уһуйаана үлэлээтэ. Ону таһынан Дьокуускай 26 №-дээх оскуолатын үөрэнээччилэрэ билигин бу үөрэх тэрилтэтин сүрүн дьиэтигэр эбии тутуллубут эбийиэгинэн туһанар кыахтаннылар.

Ил Дархан Айсен Николаев этэринэн, оскуола саҥа дьиэлэрин тутуу тупсаҕай усулуобуйалаах хаачыстыбалаах үөрэҕи хааччыйыы кыһалҕатын быһаарарга кыах биэрэр.

«Саха сиригэр кэлиҥҥи сылларга дьон-сэргэ олоҕун тупсарар саҥа социальнай уонна инфраструктурнай эбийиэктэри үлэҕэ киллэрии үгэскэ кубулуйда. Куорат уонна тыа сирэ уларыйар. Сахабыт сирэ хаһан да сайда илик саамай үрдүк тэтимигэр үктэннэ. Ити биһиги Бэрэсидьиэммит Владимир Владимирович Путин көҕүлээбит национальнай бырайыактарынан кыаллар буолла», — диэн бэлиэтээтэ Айсен Николаев.

Үөрэх эбийиэктэрэ бары наадалаах оборудованиенан хааччылыннылар. Үөрэх кылаастарын таһынан ураты успуорт уонна актовай саалалара, остолобуойдар, мэдиссиинэ хосторо бааллар. Оскуола территориятыгар физкултууранан дьарыктанар успуорт былаһааккалара тутуллуннулар.

Сиһилии манна аах.

СӨ Ил Дарханын уонна Бырабыыталыстыбатын пресс-сулууспата