Саха сиригэр ньиэп, чох, гаас, алмаас уонна көмүс хостооһунун үлэтэ түргэтээтэ

Саха сиригэр бу сыл тохсунньу ыйыттан алтынньыга диэри сир баайын хостооһуҥҥа былырыыҥҥыга холоотоххо ньиэп хостооһуна 8,5%, таас чох хостооһуна – 26,7% айылҕа гааһын хостооһун — 12,1%, алмаас -11,8%, көмүс хостооһун 2,3% үрдээбит.
— Бу сылга эрэгийиэн экэниэмикэтигэр бырамыысыланнай тэрилтэлэр 59,5%-ны, мантан 54,5% туһалаах сир баайын хостооһуннара ылар. Сыл ахсын оҥоһуллар РФ субъектарын национальнай рейтинигэр Саха сирэ Уһук Илин уокурукка иккис миэстэни ылла. Бу үчүгэй көрдөрүү. Төһө да сааҥсыйалар биллэриллибиттэрин иһин, сөптөөх былааннаммыт үлэ түмүгүнэн, бырамыысыланнай тэрилтэлэр Саха сиригэр оҥорон таһаарыыны улаатыннараллар, — диэн бэлиэтээтэ Ил Дархан Айсен Николаев. Бырамыысыланнай оҥорон таһаарыы индексэ бу сылга 110,6% тэҥнэһэр. Ньиэп, чох, гаас, көмүс хостооһунун үлэтин улаатыннарыыга соруктары былаанныыллар. Санатар буоллахха, Саха сиригэр 2030 сылга диэри тус сыаллаах оттук-энергетикэ балансатын туруга оҥоһуллан турар. 2030 сылга оҥорон таһаарыыга энергетическэй ресурсалары үс төгүл улаатыннарыы былааннанар.
Сир баайдаах саҥа сирдэри сайыннарыы Саха сирин, Уһук Илин эрэ экэниэмикэтин буолбакка, онтон да элбэххэ туһалыаҕа эрэниллэр. Ол курдук чох хостооһунун 80-90 мөлүйүөн туонна, гаас -50 миллиард куб.м. диэри, ньиэп – сылга 21 мөлүйүөн туоннаҕа тиийэ улаатыннарыы былааннанар.