Бу күннэргэ нуорматтан сылаас күн-дьыл буолара күүтүллэр

Саха сирин сорох улуустарыгар бу нэдиэлэҕэ нуорматтан таһынан сылаас күн-дьыл буолара сабаҕаланар.

Уус-Маайа улууһугар салгын температурата -12С кыраадыска диэри үрдүөҕэ.

«Бу нэдиэлэҕэ Охотскай байҕалтан сылаас салгын маассата киирэн, өрөспүүбүлүкэ үрдүнэн нуорматтан сылаас күн-дьыл буолара күүтүллэр. Ордук сылаас күн-дьыл Уус-Маайа улууһугар туруоҕа, чугастааҕы сууккаҕа салгын температурата -12…-18 кыраадыска диэри үрдүөҕэ», — диэн Саха сиринээҕи гидрометеосулууспа метеорологическай уонна агрометеорологическай сабаҕалааһыннар отделларын салайааччыта Саргылаана Никитина кэпсээбитин ЯСИА суруйар.

Эспиэр этэринэн, Дьокуускайга нуорматтан сылаас күн муҥутаан бээтинсэҕэ уонна субуотаҕа күүтүллэр. Бу күннэргэ күнүскү салгын температурата -27…-30 кыраадыска диэри үрдүөҕэ. Тохсунньу 15-16 күннэригэр салгын температурата хотугулуу-арҕаа, хоту түүнүн -45…-50°, намыһах сирдэргэ -52…-57°, арҕаа түүнүн -40…-45°, күнүһүн -33…-38°, сорох сирдэринэн -25…-30°, киин улуустарга түүнүн -32…-37°. Күнүһүн -25…-30°, соҕуруулуу-илин түүнүн -23…-28°, күнүһүн -20…-25°, сорох сирдэринэн -13…-18°, хотугулуу-илин түүнүн -28…-33°, намыһах сирдэргэ -40…-45°, күнүһүн -23…-28°, сорох сирдэринэн -33…-38° кыраадыс тымныы буолуо.