Саха сиригэр Нуучча драматическай тыйаатырын 135 сылыгар бэлэмнэнэллэр

Саха сирин баһылыга Айсен Николаев А.С.Пушкин аатынан Нуучча драматическай судаарыстыбаннай академическай тыйаатырын дириэктэрэ Александр Лобановы кытта көрүстэ. Кэпсэтии тиэмэтэ – 2026 сылга тыйаатыр үбүлүөйэ – 135 сыла.

Чуолаан, кэпсэтии үбүлүөйү көрсө  бэлэмниир Михаил Булгаков “Бег” айымньытын тула барда.

“2026 сыл бэс ыйын 6 күнүгэр үбүлүөйбүтүн бэлиэтиэхпит. Биллэн турар, саҥа испэктээкилинэн көрсөбүт. Ол курдук, Михаил Булгаков “Бег” айымньытынан туруоруу. Бу аан дойдуга буолар түгэннэринэн сибээстээн интэриэһинэй буолуо”, — диэтэ Александр Лобанов.

Лобанов көрсүһүүгэ 1957 сыллаахха тутуллубут тыйаатыр дьиэтин өрөмүөнүн тиэмэтин туруорда.

“Өйүөхпүт – тыйаатыр сайдыахтаах, дьону тардар, санааны өрө көтөҕөр сиринэн буолуохтаах”, — диэн Айсен Николаев бэлиэтээтэ.

Александр Лобанов кэлэктиип саҥа туруорууларга, гастролларга, айар эспэримиэннэргэ дьулуһарын эттэ.

“Биһигини саҥа ситиһиилэр уонна сэргэх бырайыактар күүтэллэр диэн эрэнэбит”, — диэн чопчулаата Лобанов.

Саха Өрөспүүбүлүкэтин Ил Дарханын уонна  Саха Өрөспүүбүлүкэтин Бырабыыталыстыбатын пресс-сулууспата

Хаартыска: Андрей Сорокин, ЯСИА