Саха сиригэр ОДьКХ тарыыба от ыйын 1 күнүттэн үрдүөҕэ

Сыана бэлиитикэтин судаарыстыбаннай кэмитиэтин бэрэссэдээтэлэ Николай Бочков «Якутия 24» телеханаалга “Актуальное интервью” биэрии эпииригэр тарыыбы олохтооһун туһунан сырдатта.

Быйыл от ыйын 1 күнүттэн Саха сиригэр ОДьКХ төлөбүрэ 13%-нан үрдүөхтээх. Маныаха нэһилиэнньэҕэ хомунаалынай өҥө кэккэ көрүҥнэригэр өрөспүүбүлүкэтээҕи бүддьүөт чэпчэтиилэригэр олоҕуран, сорох тарыып эмискэ үрдээбэккэ, сыыйа үрдүөҕэ,  диэн управление салайааччыта быһаарда.

— Холобур, кэнники 5 сылга сылааһы биэрии өҥөтүн тарыыба 75% үрдээтэ. Бу экэнэмиичэскэй өттүнэн бигэргэммит тарыып. Өрөспүүбүлүкэ сиригэр-уотугар чэпчэтиилээх тарыып туһунан сокуон ылыллыбыта. Тарыып Арассыыйа эрэгийиэннэригэр барытыгар 28%-ҥа диэри үрдүөҕэ. РФ Бырабыыталыстыбатын дьаһалынан, СӨ төлөбүр индексэ 13 %-ҥа диэри үрдэтиллибитэ. Ол аата гражданин уопсай төлөбүрэ 13 %-тан тахсыа суохтаах, ол гынан баран биирдиилээн муниципальнай тэриллиилэргэ 2,1 % туорааһын көҥүллэнэр. Ол аата, ханнык эрэ муниципальнай тэриллиилэргэ — 15 % буолуон сөп, атыттарга —  дьиэ-уот тупсарыллыытыгар олоҕуран — 9% буолуоҕа.

Оттук сыаната хомунаалынай тарыыбы оҥорууга улахан сабыдыаллаах, ол гынан баран кирэдьиит кээмэйэ уонна атын биричиинэлэр эмиэ сабыдыаллыыллар. Кэнники 5 сылга чох уонна ньиэп сыаналара икки төгүл үрдээтэ. Хамнас алын кээмэйин федеральнай быһаарыынан үрдэтии эмиэ 75% кэриҥэ тэҥнэстэ, онно сөп түбэһиннэрэн, хамнас пуондата эмиэ улаатан иһэр. Биллэн турар, ол тарыыпка эмиэ дьайар. Бу дойду үрдүнэн тарҕаммыт  көрүҥ. Саха сирэ, Арассыыйа биир бөдөҥ эрэгийиэнэ, оттугу уонна уматыгы тиэрдиигэ уустук балаһыанньаны көрүстэ. Уматык тиэйиитэ эрдэ тиэрдиинэн ыытылларынан сибээстээн, тустаах тэрилтэлэр кирэдьиит ылаллар. Киин баан сүрүн ыстаапката бүгүҥҥү күҥҥэ үрдүк сыанаҕа тиийбитин билэбит – 21%. Кирэдьиит бырыһыана тарыбы олохтуурга эмиэ дьайар, — диэн бэлиэтээтэ Сыана бэлиитикэтин судаарыстыбаннай кэмитиэтин бэрэссэдээтэлэ Николай Бочков. Сиһилии манна билсиҥ.