Саха сиригэр “Оҕону быыһаа” суһал-сэрэтэр тэрээһин буолан ааста

Тэрээһин оҕолор олохторун уонна доруобуйаларын харыстыырга, уустук олохтоох дьиэ кэргэттэри буларга уонна оҕону атаҕастааһын түбэлтэлэрин быһаарарга ыытыллар. Бу эпэрээссийэҕэ полиция үлэһиттэрин кытта сэрэтэр систиэмэ 219 бэрэстэбиитэлэ кытынна.

1500-чэ киһини, ол иһигэр 700-тэн тахса уустук олохтоох төрөппүттэри, 95 дьиэ иһигэр ыгааччылары-түүрээччилэри, 158 административнай хонтуруолга сылдьааччылары, сааһын туола илик оҕону атаҕастаан хаайыыга олорон тахсыбыт 11 киһини, 310  арыгыга ылларбыт ыаллары, наркотигы туттар 13 уонна урут сууттана сылдьыбыт 86 киһини бэрэбиэркэлээтилэр.

Социальнай өттүнэн кутталлаах балаһыанньалаах 374 ыал профилактическай учуокка турар.

Бэрэбиэркэлээччилэр өссө оҕолор күнүстэри-түүннэри сылдьар араас тэрилтэлэригэр, ол иһигэр реабилитационнай кииннэргэ, оҕо дьиэлэригэр, интэринээттэргэ уонна уопсай дьиэлэргэ сырыттылар. Рейдэлэр көмөҕө наадыйар оҕолор баар буолуохтарын сөптөөх сирдэри, атыы-эргиэн кииннэрин, оонньуур, спортивнай былаһааккалары, пааркалары, искибиэрдэри, аралдьытар-саататар сирдэри, быраҕыллыбыт уонна ситэ тутуллубатах дьиэлэри, дьиэлэр үрдүлэрин, булуустары кэрийдилэр.

Уопсайа 1270-ча сир бэрэбиэркэлэммит.

Хас да тэрилтэ сэрэтэр уорганнартан оҕолор эчэйиэхтэрин сөптөөх сирдэргитин хааччахтааҥ диэн дьаһалы ыллылар.

316 рейдэ сокуоннай саастарын ситэ илик оҕолорго арыгыны, энергетическэй утаҕы, табаҕы уонна да атын бородууксуйаны атыылааһын түбэлтэлэрин буларга туһуламмыта. Ол түмүгэр административнай миэрэлэр ылылыннылар, сокуоннай саастарын туола илик оҕолор сокуоннай бэрэстэбиитэллэригэр, атыы-эргиэн тэрилтэлэрин бэрэстэбиитэллэригэр, сокуоннай саастарын ситэ илик оҕолорго бэйэлэригэр уонна да атын биирдиилээн дьоҥҥо 869 официальнай сэрэтии оҥоһулунна.

Административнай быраабы кэһии туһунан кодекс 5.35 ыстатыйатынан 67 миэрэ ылылынна. Усуйаанаҕа, Уус Маайаҕа уонна Аллайыахаҕа түөрт төрөппүт, ону тэҥэ сокуоннай саастарын туола илик икки оҕо ИДьМ ЦИ профилактическай полиция кэтэбилигэр киирдилэр.

Социальнай реабилитациялыыр эбийиэктэргэ кэтэбилэ суох сылдьыбыт 29 оҕоттон (Горнай уонна Мииринэй оройуоннарыгар) үс оҕоҕо госпитализация ирдэниллибит, үс түбэлтэҕэ икки сокуоннай саастарын ситэ илик оҕолору ИДьМ Оҕолорго атаҕастабылы сэрэтэр киинигэр (ЦВСНП) аҕалбыттар.

Тэрээһин кэмигэр полиция оҕолорго сыһыаннаан икки ыар буруй оҥоһуллубутун быһаарда. Сокуоннай саастарын туола илик оҕолор инспектордара уустук олоххо түбэспит ыалларга тус сыаллаах социальнай уонна үп-харчы көмөтүн көрдөһөн, боломуочуйалаах уорганнарга сэттэ кэриҥэ сурук ыыппыттар. Алта төрөппүт Мэҥэ Хаҥалас, Аллайыаха,Эдьигээн, Өймөкөөн, Уус Маайа оройуоннарыгар үлэлии сылдьаллар. 12 төрөппүккэ медицинскэй консультация ыытылынна уонна 39 ыалга квалификациялаах юридическэй көмө оҥоһулунна, диэн иһитиннэрэр ИДьМ Саха сиринээҕи ПДН үлэтин тэрийэр салаата.