Саха сиригэр ойуур баһаара суох

Тааттаҕа 10 га иэннээх сири хаппыт биир ойуур баһаарын уоту утары охсуһааччылар умуруордулар. Бүгүҥҥү иһитиннэриинэн Саха сиригэр ойуур баһаара суох.

Ойуур баһаарын кутталлаах сезона саҕаланыаҕыттан 244 ойуур баһаара бэлиэтэммитэ. Ол иһигэр 77 ойуур (уот хаппыт уопсай иэнэ 24 тыһ.гект.) уонна 167 ландшафтнай баһаар (уот хаппыт уопсай иэнэ 5,4 тыһ.гект.) бэлиэтэммитэ.

Мантан 241 баһаары уоту утары охсуһааччылар тиэхиньикэ уонна авиация көмөтүнэн умуруорбуттара, ардахтан үс ойуур баһаара умуллубута.

Баһаартан сэрэхтээх буолуу ураты эрэсиимэ Дьааҥы оройуонугар уонна Дьокуускайга салҕанар. Ойуур баһаарын куталлаах сезона өрөспүүбүлүкэ сиригэр-уотугар ыам ыйын 1 күнүттэн биллэриллибитэ.

СӨ Ил Дарханын уонна Бырабыыталыстыбатын пресс-сулууспата