Саха сиригэр ойуур баһаардарын ахсаана сэттэҕэ диэри аҕыйаата

Ааспыт суукка устата Дьааҥы, Кэбээйи, Аллараа Халыма, Орто Халыма уонна Томпо улуустарыгар уопсайа 61 тыһыынча гектартан тахса иэни хаппыт 9 ойуур баһаара умуруорулунна. Бу туһунан СӨ  Ил Дарханын уонна Бырабыыталыстыбатын пресс-сулууспата иһитиннэрэр.

Атырдьах ыйын 9 күнүнээҕи туругунан, өрөспүүбүлүкэҕэ 2 207 гектар иэҥҥэ 7 ойуур баһаара умайа турар. Тэҥнээн көрдөххө, былырыын бу кэмҥэ 570 361,3 гектар иэҥҥэ 78 ойуур баһаара умайара. Баһаар кутталлаах кэмэ саҕаланыаҕыттан уопсайа 189 141, 84 гектар иэҥҥэ 499 ойуур баһаара умуруорулунна.

СӨ Ил Дарханын Ыйааҕынан, бэс ыйын 5 күнүттэн өрөспүүбүлүкэ бары сиригэр-уотугар уот куттала суох буолуутун ураты эрэсиимэ биллэриллибитэ. Ону таһынан, ураты эрэсиимнэр Дьааҥы, Өлүөхүмэ, Чурапчы уонна Эбээн-Бытантай улуустарыгар, ону тэҥэ Жатай бөһүөлэгэр киллэриллибиттэрэ. Баһаартан сэрэхтээх буолуу кэмэ саҕаланыаҕыттан айылҕа баһаардарын 73 буруйдааҕа быһаарылынна, ойуурга баһаартан сэрэхтээх буолуу быраабылаларын кэһии иһин 150 боротокуол оҥоһулунна.

Айылҕа баһаарын буллугут да, Ойуур хаһаайыстыбатын эрэгийиэннээҕи диспетчерскэй сулууспатыгар бу нүөмэринэн эрийиҥ: 7-4112-44-74-76. Ону таһынан, ойуур харабылын биир кэлим нүөмэригэр эрийиэххэ сөп: 8-800-100-94-00.