Саха сиригэр ойуур баһаардарын барытын умулларбыттар

Өрөспүүбүлүкэтээҕи суһал ыстаап чахчытынан, бэс ыйын 18 күнүгэр Саха сиригэр биир даҕаны айылҕа баһаара суох.

Ааспыт сууккаҕа 526 гектар иэннээх түөрт ойуур баһаарын умулларбыттар. Эдьигээн, Муома, Сунтаар улуустарыгар көрдүгэннэрэ баалларын булбуттар.

Саха сиригэр баһаар турар кутталлаах кэмэ саҕаланыаҕыттан барыта 60 307,45 га иэнээх 331 айылҕа баһаарын умуруорбуттар. Ол иһигэр ойуур пуондатын сиригэр тахсыбыт 53 830,45 га иэннээх 146 баһаары. Быйыл баһаары умулларыыга суһал хамсаныы 70% тэҥнэспит.

2025 сылга айылҕа баһаара тахсыытыгар буруйдаах 52 киһи быһаарыллыбыт. Баһаартан сэрэхтээх буолуу быраабылатын кэһиигэ 110 административнай боротокуолу толорбуттар.

Санатан эттэххэ, 2025 сыл бэс ыйын 5 күнүттэн Саха сирин бары сиригэр-уотугар баһаары утары ураты эрэсиим үлэлиир. Итини таһынан, Дьааҥы, Уус Алдан, Өлүөхүмэ уонна Эбээн Бытантай улуустарыгар, ону тэҥэ, Жатай уонна Дьокуускай куораттааҕы уокуруктарга баһаары утары уруты эрэсиим биллэриллибитэ. Ити туһунан СӨ Ил Дарханын уонна Бырабыыталыстыбатын пресс-сулууспата суруйар.