Саха сиригэр ойуур баһаарын бохсууга 450-тан тахса киһи үлэлиир

Саха сирин 8 улууһугар уопсайа 34 675,2 га сиргэ ойуур баһаара умуруорулунна.

Маннык дааннайдары бүгүн сарсыарда, бэс ыйын 6 күнүгэр,  Экология министиэристибэтэ иһитиннэрдэ. Алдан, Үөһээ Бүлүү, Мэҥэ Хаҥалас, Нерюнгри, Өлүөхүмэ, Томпо, Хаҥалас уонна Эбээн Бытантай улуустарыгар ойуур баһаарын бохсууга 457 киһи уонна 22 тиэхиньикэ үлэлиир. Көтөр аалынан кэтээн көрүүлэри тэрийиигэ 18 салгын суудуналара уонна  ойуур баһаара турбут миэстэтигэр үлэһиттэри таһыыга 6 бөртөлүөт тардылынна.

Саха сиригэр ойуур баһаарын сезона саҕаланыаҕыттан барыта 49 ойуур баһаара умуоруллубута биллэр.

Саха сирин барыта 12 улуустарынан — Алдан, Амма, Үөһээ Бүлүү, Үөһээ Дьааҥы, Кэбээйи, Өлүөхүмэ, Мэҥэ Хаҥалас, Сунтаар, Томпо, Хаҥалас, Уус Алдан уонна Таатта улуустарынан, ону кытта Дьокуускайга ураты баһаарынай эрэсиимэ биллэриллибитэ.

Ойуур баһаара тахсыбытын туһунан быһа лииньийэҕэ 8 800 100-94-00 төлөпүөн нүөмэригэр эрийэн биллэриэххэ сөп.