Саха сиригэр ойуур баһаарын умулларыыга 652 киһи уонна 34 тиэхиньикэ кыттар
![](https://sakha-sire.ru/wp-content/uploads/2024/06/tya-1060x596.jpg)
Бэс ыйын 16 күнүгэр киэһэ Арассыыйа ЫБМ Киин управлениетын СӨ начаалынньыгын бастакы солбуйааччы Виталий Немцов салайан ыыппыт СӨ ЫБМ сэрэтиигэ, туоратыыга уонна баһаартан куттал суох буолуутун хааччыйыыга Хамыыһыйатын Суһал ыстаабын мунньаҕар өрөспүүбүлүкэҕэ ойуур баһаардарын умулларыыга 652 киһи уонна 34 тиэхиньикэ үлэлиир диэн этилиннэ.
Авиапатруллааһыҥҥа эрэгийиэҥҥэ 11 салгын суудуната, умулларыыга – 5 кытталлар. Бе-200 ЧС амфибия-сөмөлүөт көтөргө бэлэм уонна Дьокуускай куоракка баазаланар.
Экологияҕа, айылҕаны туһаныыга уонна ойуур хаһаайыстыбатыгар министиэристибэ иһитиннэрбитинэн, суукка устата өрөспүүбүлүкэҕэ 27,1 тыһыынча гектардаах сиргэ 15 ойуур баһаарын Алдан, Амма, Бүлүү, Мэҥэ Хаҥалас, Муома, Өймөкөөн, Өлүөхүмэ, Уус Алдан оройуоннарыгар умуллардылар.
Отчуоттуур кэм устата 2568,2 гектарга 16 ойуур уота булулунна. Билигин Саха сиригэр 125782,4 гектарга 87 ойуур баһаара бэлиэтэнэр. Нэһилиэнньэлээх пууннарга куттал суоһаабат.
Өлүөхүмэ оройуонугар 269 киһи уоту кытта туруулаһар, ол иһигэр ойуур баһаардарын умулларар федеральнай тэриллиилэр. Бу оройуоҥҥа 7 баһаартан иккитин умулларбыттар.
Уус Маайаҕа 5 сиргэ бэлиэтэммит, 95 киһи ону умулларар, ол иһигэр федеральнай тэриллиилэртэн — 46 киһи.
Томпо оройуонугар 10 сиргэ умайар. Бэс ыйын 16 күнүгэр Хаандыгаҕа, Теплай Ключка үлэ ыытыллар. 97 киһи киһи уонна 18 тиэхиньикэ кыттар.
Арассыыйа ЫБМ Киин управлениетын СӨ начаалынньыгын бастакы солбуйааччы Виталий Немцов мунньахха оройуоннар баһылыктарыгар ойуур уотун умулларыыга сөптөөхтүк, уталыппакка дьаһаналларыгар соруйда.
Санатан суруйдахха, Саха сиригэр баһаартан кутталлаах кэм ыам ыйын 6 күнүттэн саҕаламмыта. Бэс ыйын 11 күнүттэн өрөспүүбүлүкэ сиригэр-уотугар эрэгийиэн көрүҥнээх ыксаллаах балаһыанньа эрэсиимэ олохтоммута. ЫБ эрэсиимэ олохтоох таһымҥа Томпо, Өлүөхүмэ, Амма, Уус Маайа оройуоннарыгар биллэрилиннэ.
Баһаары утары уһулуччу эрэсиим Алдан, Амма, Бүлүү, Дьааҥы, Үөһээ Бүлүү, Кэбээйи, Өлүөхүмэ, Муома, Мэҥэ Хаҥалас, Нерюнгри, Нам, Сунтаар, Орто Халыма, Томпо, Таатта, Хаҥалас, Уус Алдан, Уус Маайа оройуоннарыгар уонна Дьокуускайга олохтонно.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.
Сообщить об опечатке
Текст, который будет отправлен нашим редакторам: