Саха сиригэр ойуур баһаарын умуруорууга комплекснай былаан ылылынна

Саха сиригэр 2023 сылга ойуур баһаарын утары үлэҕэ комплекснай былаан ылылынна. Харыстаныллар ойуур иэнэ 70 мөл. гектарга диэри улаатара ситиһиллибитин туһунан Ил Дархан Айсен Николаев «Якутия, вперёд!» биэриигэ кэпсээтэ. 

«2023 сылга сүрүн уратынан көрөр-истэр сирбит-уоппут иэнэ 50 мөл. гектартан 70 мөл. гектарга диэри улаатта. Бу олус сөптөөх ситиһии буолар, 40 бырыһыан кэриҥэ улаатара ситиһилиннэ», — диэн Айсен Николаев быһаарда.  Айсен Николаев өрөспүүбүлүкэҕэ сири-уоту көрүү-истии кэҥээбитинэн сибээстээн,  эбии авиаотделениелар уонна саҥа авиамаршруттар баар буолуохтара диэн быһаарда.  Ону тэҥэ,  синоптиктар быйыл эмиэ кураан уонна итии сайын буоларын эппиттэрин туһунан иһитиннэрдэ. Ордук бэс ыйа сэрэхтээх буолара күүтүллэр.  Саха сиригэр ойуур баһаардара турар, саҕаланар кэмнэригэр  федеральнай күүстэр кэлэн үлэлиэхтэрэ.  Ону тэҥэ,  өрөспүүбүлүкэҕэ искусственнай ардаҕы ыҥырыы эспириэмэни салгыы ыытыллыаҕа.