Хаартыска: Якутия24
Саха сиригэр «Ойууру авиация көмөтүнэн харыстыыр Дьокуускайдааҕы баазата» тэрилтэ Эдьигээн уонна Орто Халыма куораттарыгар тэриллэр икки саҥа авиа-салааларыгар үлэһиттэри ылыы бара турар.
Бу туһунан бүгүн «Якутия24» ханаал «Актуальное интервью» биэриитин эпииригэр «Ойууру авиация көмөтүнэн харыстыыр Дьокуускайдааҕы баазата» судаарыстыбаннай тэрилтэ салайааччыта Владимир Леонов иһитиннэрдэ.
«Хас биирдии салаа штатыгар 30-туу киһи баар буолуоҕа, ол иһигэр 23 десантник-баһаарынай. Эдьигээн уонна Орто Халыма улуустарыгар саҥа салаалары тэрийии баһаардары эрдэ булууну уонна умуруорууну түргэтэтиэҕэ. Онно салгын ааллара, лүөччүк-кэтээччилэр уонна парашютнай-десантнай баһаарынай сулууспа күүстэрэ олохтонуохтара. Саха сиригэр ыам ыйын 1 күнүттэн саҕаланар баһаар кутталлаах кэмигэр ити салаалар үлэҕэ бэлэм буолуохтара», – диэн Леонов бэлиэтээтэ. Кини ону таһынан 2027 сыллаахха Абый улууһугар авиа-салааны үлэҕэ киллэрэр былааннаахтарын эттэ. Владимир Леонов 2025 сыллаахха Саха сиригэр икки саҥа авиа-салаа – Витимнээҕи уонна Саҥыйахтаахтааҕы үлэҕэ киирбиттэрин санатта. Үлэҕэ ылыллыбыт үлэһиттэр уопсай ахсааннара 181 киһи буолла, ол иһигэр: 148 парашютнай-десантнай баһаарынай сулууспа үлэһитэ, 2 авиа-салаа начаалынньыга, 4 суоппар, 23 тиэхиньик-радиооператор уонна 4 лүөччүк-кэтээччи. Саха сирин Авиалесоохранатыгар уопсайа 1100 киһи үлэлиир. Ааспыт баһаар кутталлаах кэмин түмүгүнэн, Саха сирин ойуур пуондатыгар 160,4 тыһ. га иэннээх сири хаппыт 400 уот турбут түбэлтэтэ бэлиэтэннэ. Бу көрдөрүүлэр ааспыт сыллааҕар быдан намыһахтар: уот туруутун ахсаана 2,6 төгүл, оттон уокка былдьаммыт иэн 20 төгүл аҕыйаата. Баһаары умуруоруу рекорд олохтоото: баһаардар 64% бастакы суукка иһинэн умуруорулуннулар. Бэлиэтэммит баһаардар үс гыммыт иккититтэн ордуга 24 чаас иһинэн бохсулунна. СӨ Ил Дархана Айсен Николаев Ил Түмэҥҥэ туһаайан этиитигэр, Владимир Путин өйөбүлүнэн уонна сэрэтиигэ тиһиктээхтик сыһыаннаһыы түмүгэр ойуур баһаардарын балаһыанньата уларыйбытын бэлиэтээбитэ. 2025 сыллаахха эрэгийиэн сиригэр-уотугар бастакытын ойуурдарга ыксаллаах быһыы-майгы эрэсиимэ биллэриллибэтэ.
Амма улууһун Амма сэлиэнньэтигэр аныгы поликлиника аһылынна. Саҥа мэдиссиинэ киинэ биир симиэнэҕэ 200 сырыыны көрөргө…
Байыаннай дьайыыга барбыт инструктордар бөлөхтөрүгэр Саха сириттэн, Камчатка кыраайыттан, Волгоград, Мурманскай уонна Сахалин уобаластарыттан 25…
ИДьМ улууспатын Үөһээ Бүлүү оройуонун отделын дьуһуурунай чааһыгар кыбартыыраттан тэлэбиисэрин уорбуттарын туһунан олохтоох киһиттэн үҥсүү…
Айсен Николаев үөрэх эйгэтигэр оптимизация үөрэххэ охсуута суох ыытыллыахтаах диэтэ. Бу туһунан Саха сирин Ил…
Ил Дархан Айсен Николаев үөрэх үлэһиттэрин тохсунньутааҕы мунньаҕын иитинэн ыытыллыбыт “Кадровая экосистема образования Якутии: создаем…
Кулун тутар 1 күнүттэн микрозайм ыларга киһи ким буоларын биометрия көмөтүнэн бигэргэтэр ирдэниэҕэ. Бу саҥа…