Саха сиригэр Олимпиада 4 төгүллээх чөмпүйүөнэ Александр Попов кэлиэҕэ

Олунньу 6 күнүгэр 15:00 чаастан Дьокуускайга «Чолбон» бассейнҥа түөрт төгүллээх олимпийскай чөмпүйүөн, аан дойду алта төгүллээх чөмпүйүөнэ, хас да төгүллээх рекордсмена Александр Попову кытта көрсүһүү буолуоҕа. Бу туһунан СӨ Успуорка министиэристибэтин пресс-сулууспата иһитиннэрэр.

Тэрээһин оҕолорго, кинилэр төрөппүттэригэр уонна успуорду таптааччыларга туһаайыллар. Көрсүһүү кыттыылаахтара спортсмены кытта кэпсэтиэхтэрин, ыйытыы биэриэхтэрин сөп.

«Оҕолору, кинилэр төрөппүттэрин Александр Попову кытта көрсөн кэпсэтэ, интэриэһиргиир ыйытыыларгытын биэрэ кэлэргитигэр ыҥырабыт. Кини спортивнай карьераны оҥостуу туһунан сыаналаах сүбэлэрин эдэр спортсменнарга биэриэҕэ. Киириитэ босхо, баҕалаахтары күүтэбит. Көрсүһүү кэмигэр автограф-сессия ыытыллыаҕа», — диэн «Чолбон» дириэктэрэ Петр Черкашин этэр.