Саха сиригэр Олоҥхо күнүн киэҥник бэлиэтиэхтэрэ

Быйыл Олоҥхо күнүн чэрчитинэн өрөспүүбүлүкэ улуустарыгар араас куонкурустар, бэстибээллэр, быыстапкалар, испэктээктэр, научнай-быраактыычаскай кэмпириэнсийэлэр, квестар, көрсүһүүлэр, айар биэчэрдэр, кинигэлэр биһирэмнэрэ, олоҥхону толоруу тэрээһиннэрэ былааннаналлар.

Өрөспүүбүлүкэ улуустарыгар сэтинньигэ «Ыалга олонхолооһун», «Олоҥхоһут – оскуолаҕа», «Олоҥхо дойдутунан олоҥхолоох айан», «Тэрилтэнэн олоҥхону истии», «Истээччини иитии» бырайыактар үлэлиэхтэрэ. Үүнэр көлүөнэ тыйаатыра үөрэх тэрилтэлэригэр «Орто дойду олохтооҕо Ордьоот оҕонньор» олоҥхо матыыбынан испэктээги көрдөрүөҕэ.

Олоҥхо күнүн бырагыраамаатыгар оҕолор уонна улахан дьон кыттыылаах үгүс трээһин баар. Ол курдук, 7-10 кылааастар үөрэнээччилэрин ортолоругар олоҥхоҕо ыраахтан V өрөспүүбүлүкэтээҕи олимпиада, «Олоҥхолуур куукулам» куукулалар бэстибээл-куонкурустара, «Муҥха олоҥхото» ыччаттар уонна устудьуоннар бэстибээллэрэ уо.д.а. ыытыллыахтара. Ону сэргэ олоҥхо матыыптарынан испэктээктэр уонна олоҥхону толоруу үгүс дьон сэҥээриитин ылыахтара.

Сэтинньи 25 күнүгэр, Олоҥхо күнүгэр Ил Дархан Айсен Николаев олоҥхоһуттарга, оһуохайы таһаарааччыларга, уустарга уонна норуот маастардарыгар сэртипикээттэри туттарыаҕа. Өксөкүлээх Өлөксөй ааатынан Норуоттар доҕордоһууларын дьиэтигэр Олоҥхо күнүгэр аналлаах үөрүүлээх биэчэр буолуоҕа.

Өрөспүүбүлүкэҕэ Оҕо саас сылынан Олоҥхо күнүгэр Олоҥхо тыйаатырын уонна П.И.Шадрин аатынан Өктөм уопсай үөрэхтээһинин оскуолата оҕолорго аналлаах олоҥхо-испэктээги көрдөрүөхтэрэ.