Саха сиригэр онкодиспансер тутуута түмүктэнэн эрэр

Уһук Илиҥҥэ биир саамай улахан онкодиспансер тутуллан түмүктэнэн эрэр. Билиҥҥитэ дьиэ докумуона оҥоһуллар, оборудованиелары холбууллар. Үлэ хайдах бара турарын Ил Дархан Айсен Николаев бэрэбиэркэлээтэ диэн Ил Дархан уонна Бырабыыталыстыба дьаһалтатын пресс-сулууспата иһитиннэрэр.

Өрөспүүбүлүкэ баһылыгын сорудаҕынан, тутуу үлэтэ икки түһүмэххэ араарыллыбыта. Үлэ нэдиэлэтэ саҕаланыыта бастакы түһүмэх докумуоннара бэриллиэхтэрэ. Иккис түһүмэххэ тас дойдулартан кэлэр оборудованиелары быһаарыахтара.

Айсен Николаев бэлиэтээбитинэн, тутуу үлэлэрэ түмүктэнэн эрэллэр, онон бырааһынньыктааҕы өрөбүллэр кэннилэриттэн тутааччы тутуу надзорун уорганнарыгар сайаапкатын биэриэҕэ.

Онкодиспансер Дойду Бэрэсидьиэнэ Владимир Путин көҕүлээбит «Доруобуйа харыстабыла» национальнай бырайыак  иитинэн тутуллар.