Саха сиригэр оҥоһуллубут 11 оҥоһуу өй бырайыагын билиһиннэрдилэр

Саха сиригэр оҥоһуллубут оҥоһуу өй (ИИ) эйгэтигэр 11 бырайыагы «AI Journey» норуоттар икки ардыларынааҕы кэмпириэнсийэҕэ билиһиннэрдилэр. Тэрээһиҥҥэ Арассыыйаттан, Кытайтан, Индияттан, Бразилияттан уонна да атын дойдулартан бастыҥ исписэлиистэр, урбаанньыттар уонна чинчийээччилэр мустан, оҥоһуу өй эйгэтигэр сүрүн трендэри уонна ыарахаттары, биисинэскэ, наукаҕа уонна социальнай эйгэҕэ быраактыкаҕа туһаныытын ырыттылар.

«Сыл анараа өттүгэр өрөспүүбүлүкэҕэ Сбер оҥоһуу өй лабораториятын арыйбыппыт. Бүгүн ити үлэ түмүгүн сыаналыахха сөп: истиэндэҕэ көрдөрүллүбүт 108 бырайыактан 11-рэ Саха сиригэр оҥоһуллубут, онтон 6-та Оҥоһуу өй лабораториятын кытта бииргэ оҥоһуллубут. Ити биһиги хамаандаларбыт үрдүк кыахтарын уонна үлэлэрин таһыма үрдүгүн бигэргэтэр. Бырайыактар истэригэр — Арассыыйа 11 эрэгийиэнигэр дьоҥҥо көмөлөһөр «Обращайся» сыыппара юриһа, уонна сарсын «ИИ лидердэрэ» бириэмийэ финалыгар кыттар «Киберкөмүскээччи» бааллар», — диэн СӨ Ил Дархана тус ТГ-ханаалыгар суруйда.

Айсен Николаев Саха сиригэр ИИ-гы салгыы сайыннарар уонна бу эйгэҕэ компетенциялары бөҕөргөтөр үлэ салҕанарын бэлиэтээтэ. Сбер Дьокуускайдааҕы салаатын салайааччыта Олег Бугай өрөспүүбүлүкэҕэ ИИ-бырайыактары сайыннарыыга партнердаһыы суолтатын бэлиэтээтэ.

«Биһиэхэ Саха сирин сөхтөрөр сыыппараҕа сайдыытын сорҕото буоларбыт — ити улахан чиэс. Холбоһуктаах Оҥоһуу өй лабораториябыт 6 бырайыага норуоттар икки ардыларынааҥы кэмпириэнсийэҕэ биһирэммитэ. Ити эрэгийиэн уонна биисинэс көдьүүстээх партнердаһыылара саамай далааһыннаах сыыппара көҕүлээһиннэрин олоххо хайдах киллэрэрин чаҕылхай холобурунан буолар. Биһиги Саха Өрөспүүбүлүкэтин эрэгийиэн эрэ курдук буолбакка, дойду үрдүнэн инники күөҥҥэ сылдьар ИИ-быһаарыылары оҥорууга стратегическай партнер быһыытынан көрөбүт», — диэтэ кини. Оҥоһуу өй эйгэтигэр Альянс кыттыытынан Сбер тэрийбит X «AI Journey 2025» норуоттар икки ардыларынааҕы кэмпириэнсийэтэ сэтинньи 19-21 күннэригэр Москваҕа ыытыллар. Быйыл тэрийээччилэр генеративнай ИИ-ны быраактыкаҕа туһаныыга уонна киһи кыаҕын хаҥатарга технологиялар кыахтарын биисинэскэ уонна уопсастыбаҕа көрдөрөр кейстэргэ болҕомтолорун уурдулар.