Салгыы
Саха сиригэр оптуобус тохтобулугар, пааркаҕа табах тардар көҥүллэмэт буолуоҕа

Саха сиригэр оптуобус тохтобулугар, пааркаҕа табах тардар көҥүллэмэт буолуоҕа

27.03.2024, 18:00
Хаартыска: pxhere.com
Бөлөххө киир:

Ил Түмэҥҥэ кулун тутар 26 күнүгэр табаҕы тардыыны сэрэтиигэ уонна хааччахтыырга өрөспүүбүлүкэтээҕи сокуон барыла киллэрилиннэ.

Бу иннинэ Саха сиригэр  табаҕы тардыыны сэрэтиигэ уонна хааччахтыырга өрөспүүбүлүкэтээҕи сокуон ылылла илигэ. Федеральнай сокуоҥҥа тирэҕирэн, сокуон барылынан нэһилиэнньэ доруобуйатын табах буруотун дьайыытыттан эбэтэр никотиннаах бородууксуйаны тардыы содулуттан харыстыыр, табаҕы тардыы тарҕаныытын аҕыйатар инниттэн дьаһаллар сүрүннэнэллэр.

Онон парламеҥҥа муус устар ыйыгар буолар пленарнай мунньахха норуот дьокутааттара сокуон барылын ылыннахтарына, Саха сиригэр тустаах уопсастыбаннай сирдэргэ табаҕы, никотиннаах бородууксуйаны тардыыга эбии хааччахтар олохтонуохтара.

Чуолаан, Саха сиригэр бэлэмнэммит сокуон барылынан табаҕы тардыы бобуллуоҕа:

— уопсастыбаннай тырааныспар тохтобулугар итиэннэ онтон 15 миэтэрэ чугас сиргэ;

— сынньалаҥҥа, туризмҥа, физическэй култууранан уонна успуордунан дьарыктанарга анаммыт уонна туһаныллар паарка сиригэр-уотугар.

Сокуон барылын сыһыары быһаарыы суругар суруллубутунан, СӨ Ис Дьыалаҕа министиэристибэтин дааннайдарынан РФ Административнай буруйу оҥоруу туһунан Кодексатынан Ис Дьыала сулууспатын үлэһиттэрэ былырыын Саха сиригэр барыта 183 административнай буруйу оҥорууну бэлиэтээбиттэр.

Билигин федеральнай сокуонунан дойду эрэгийиэннэрэ  судаарыстыбаннай былаас уорганнарын кэккэ уопсастыбаннай сирдэргэ уонна эбийиэктэригэр табаҕы, никотиннаах бородууксуйаны тардыыга эбэтэр кальяны туһаныыга эбии хааччахтары олохтуур бырааптаахтар. Ол курдук, дойду 28 субъегар табаҕы тардыы эбии хааччахтара олохтоммуттара. Бу субъектарга бары кэриэтэ уопсастыбаннай тырааныспар тохтобулугар итиэннэ онтон 15 миэтэрэ чугас сиргэ табаҕы, никотиннаах бородууксуйаны тардар сокуонунан көҥүллэммэт.

Олоххо киирбит федеральнай сокуонунан табах тардар бобуллар:

  1. Оскуолалар, училищелар уонна атын үөрэх тэрилтэлэрин кытта сэргэ култуура, успуорт уонна ыччат дьыалаларыгар уорганнарын эбийиэктэрин таһыгар;
  2. Поликлиникалар, балыыһалар, санаторийдар, о.д.а. итинник өҥөнү оҥорор тэрилтэлэр эбийиэктэрин таһыгар;
  3. Тимир суол баксаалларын, массыына баксаалларын, аэропортарын, муора уонна өрүс портарын, ону таһынан метро ыстаансыйаларын эбийиэктэрин 15 миэтэрэ чугас сиргэ;
  4. Оҕо былаһааккаларыгар уонна сөтүө сиригэр;
  5. Сапыраапкаларга;
  6. Лифтарга уонна элбэх кыбартыыралаах дьиэлэр уопсай туһаныы подъездтарыгар;
  7. Тырааныспарга, гостиницаларга, рестораннарга, офистарга уонна арендаҕа олорор кыбартыыраларга.

Манна бэлиэтээн эттэххэ, федеральнай сокуонунан атыы-эргиэн сиригэр эбэтэр атын тэрилтэлэргэ бас билээччилэр туһааннаах табах тардар анал хостору тэрийэр кыах бэриллибитэ.

+1
1
+1
2
+1
0
+1
0
+1
2
+1
0
+1
0
Бары сонуннар
Салгыы
22 июня
  • 13°C
  • Ощущается: 12°Влажность: 82% Скорость ветра: 1 м/с

Сообщить об опечатке

Текст, который будет отправлен нашим редакторам: