Саха сиригэр ОРВИ-нан ыалдьыы элбээтэ

Өрөспүүбүлүкэҕэ ааспыт нэдиэлэ түмүгүнэн, Саха сиригэр  8,8 тыһыынча киһи тымныйбыта, тумуулаабыта (ОРВИ) бэлиэтэммит. Бу ол иннинээҕи нэдиэлэттэн 97% элбэх.

ОРВИ уонна грипп лабораторнай чинчийиилэрин түмүгүнэн көрдөххө, өрөспүүбүлүкэҕэ   риновирус,  парагрипп, RC-вирус, аденовирус, бокавирус, коронавирус баара бэлиэтэммит.

Роспотребнадзор ыарыыга хаптарбат туһугар кэккэ миэрэлэри тутуһуҥ диэн сүбэлиир: илиигитин мыылалаан кичэйэн суунуҥ, ыалдьыбыт дьонтон тэйиччи сылдьыҥ, хоскутун кэмиттэн-кэмигэр салгылатыҥ, элбэх дьон мустар сиригэр сылдьа сатаамаҥ эбэтэр маасканы кэтиҥ, кирдээх илиигитинэн сирэйгитин, хараххытын, муннугутун таарыйымаҥ, чөл олоҕу тутуһуҥ, ыарыы сибикитэ билиннэҕинэ бэйэҕит эмтэнимэҥ, суһаллык бырааска көрдөрүнүҥ.