Саха сиригэр от ыйын 1 күнүттэн көтөрү бултуурга көҥүллэри биэрии саҕаланна

Саха сиригэр от ыйын 1 күнүттэн 2025-2026 сс. бултааһын сезонугар саамай тарҕаммыт бултка — көтөрү бултааһыҥҥа көҥүллэри биэрэн саҕалаатылар.

Көтөрү бултуурга көҥүлү хантан уонна хайдах ылар туһунан эрэгийиэннээҕи Айылҕа харыстабылын министиэристибэтэ иһитиннэрэр.

Булчуттар сайабылыанньаны эрэгийиэннээҕи судаарыстыбаннай уонна муниципальнай өҥөлөр порталларыгар тэйиччиттэн олорон биэриэхтэрин сөп. Докумуон порталга анаммыт күнүнэн уонна кэминэн бэриллэр.

Саха сирин улуустарынан бултка көҥүлү Айылҕа харыстабылын министиэристибэтин судаарыстыбаннай экологическай надзор кэмитиэттэригэр уонна иниспиэксийэлэригэр биэрэллэр. Дьокуускайга  — 202-с түөлбэ, 18/2 куорпус, 2-с этээс аадырыска (Дьокуускайдааҕы судаарыстыбаннай экологическай надзор кэмитиэтэ). «Мин докумуоннарым» офистарыгар бу өҥө 5 үлэ күнүн иһинэн оҥоһуллар. Маныаха булчут билиэтэ уонна пошлина төлөммүтүн туоһулуур кибитээнсийэ ирдэнэр.