Саха сиригэр «ОТОН.фест» бастакы өрөспүүбүлүкэтээҕи дьиэ кэргэн патриотическай бэстибээлэ саҕаланна

Саха сиригэр «ОТОН.фест» бастакы өрөспүүбүлүкэтээҕи дьиэ кэргэн патриотическай бэстибээлэ саҕаланна.

Тэрээһин кыттыылаахтарыгар биһирэбил туттарыллара күүтүллэр. Үс сүрүн бирииһи «Текта» девелоперскай хампаанньа биэриэҕэ. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Бэстибээл Саха сиригэр Оҕо саас уонна Арассыыйаҕа Дьиэ кэргэн сылын чэрчитинэн  атырдьах ыйын 22 күнүттэн балаҕан ыйын 27 күнүгэр диэри  ыытыллыаҕа. Бэстибээл бырагырааматынан суруйааччылары, кинорежиссердары, актердары, музыканнары, ону тэҥэ маастар-кылаастары, интеллектуальнай викториналары, дебаттары, куонкурустары, ол иһигэр «Саха комикс» уонна «Тыл Баттл» тэрээһиннэрэ буолуохтара. «Саха сирин тыйаатырдара култуура тэрилтэлэригэр биллэриллибит Оҕо тыйаатырын ускуустубатын сылын чэрчитинэн оҕолорго испэктээктэри, оттон киинэ тыйаатырдара дьиэ кэргэҥҥэ сыһыаннаах киинэлэри уонна ойуулуктары көрдөрүөхтэрэ»,  – диэн тэрийээччилэр биллэрдилэр.

«ОТОН.фест» Арассыйа судаарыстыбаннай былааҕын күнүгэр саҕаланна. Бу күн Дьокуускай киинигэр оҕолорго уонна улахан дьоҥҥо босхо култуурунай-сырдатар тэрээһиннэр, ол иһигэр кэнсиэр уонна оҕо үҥкүү флешмобтара ыытыллыахтара. Бэстибээл кыттыылаахтарынан оҕолоох дьиэ кэргэттэр буолаллар. Кинилэргэ анаан-минээн маннык киэҥ далааһыннаах эрэгийиэн таһымыгар биһирэбил тиһигин киллэриэхтэрэ. Кыайыылаахтары наҕараадалааһын балаҕан ыйын 27 күнүгэр, Саха сирин Судаарыстыбаннаһын күнүгэр, Николаев-кииҥҥэ ыытыллыаҕа.

Ону сэргэ бэстибээл былаһааккалара СӨ Национальнай бибилиэтикэтигэр, «ДТК- ааҕыы киинэ», бибилиэтиэкэлэргэ уонна түмэллэргэ, «Харысхал» аһымал пуондатыгар, Ем. Ярославскай аатынан хотугу норуоттар устуоруйаларын уонна култуураларын түмэлигэр, Национальнай художественнай түмэлгэ, академик Афанасий Осипов хартыына галереятыгар аһыллыахтара.