Теплоходунан пассажирдары таһыы бэс ыйыттан саҕаланыа

Бүгүҥҥү күҥҥэ Өлүөнэ, Алдан, Бүлүү өрүстэринэн паромнар толору үлэлииллэр. Бу туһунан Тырааныспарга уонна суол хаһаайыстыбатын миниистирин солбуйааччы Семен Коркин иһитиннэрдэ.

«Бэҕэһээ Кангалассы-Суотту хайысханан паром сырыыта саҕаламмыта. Онно икки паромтан биир суудуна үлэлиир. Нэдиэлэ бүтүүтэ эбии суудуна тахсара былааннанар. Дьокуускай – Аллараа Бэстээх хайысханан бүгүҥҥү күҥҥэ 10 паром үлэлиир. Флот сыыйа улаатар. Нэдиэлэ бүтүүтэ икки паром тахсара күүтүллэр, аныгыскы нэдиэлэҕэ өссө икки паром өрөмүөн кэнниттэн тахсыаҕа», — диэтэ Семен Коркин.

Бэс ыйын 2 күнүттэн киин улуустарынан кэммиэрчэскэйэ суох сыалга туттуллар аччыгый суудунуҕа навигация үлэтэ аһыллыаҕа. Хоту оройуоннарга навигация бэс ыйын 10 күнүттэн, Арктика улуустарыгар — бэс ыйын 16 күнүттэн саҕаланыаҕа. Туһааннаах бирикээс таҕыста.
Оттон Саха сирин социальнай суолталаах маршруттарынан пассажирдары таһыы бэс ыйыгар саҕаланыаҕа.

Семен Коркин этэринэн, бүгүҥҥү күҥҥэ субсидиялааһыҥҥа куонкурустаах тэрээһиннэр түмүктэнэллэр.
«Өрүһүнэн навигация туһунан эттэххэ, бүгүҥҥү күҥҥэ судаарыстыбаннай бырагырааманан 38 мөлүйүөн солкуобай көрүллүбүт. Бэс ыйын 5-6 күнүттэн саҕалаан кыра үрэхтэргэ, ону таһынан Марха, Дьааҥы, Алдан, Лена өрүстэригэр маршруттарынан түмүгү таһаарыахтара. Билигин субсидияламмыт рейстэри толорууга үбэ хааччахтаммытынан сибээстээн, навигация кэмигэр түҥэтиллиэҕэ. Дьокуускай- Өлүөхүмэ, Пеледуй – Витим хайысхаларынан таһаҕаһы таһыы бэс ыйыттан саҕаланар. Ону тэҥэ Тиксии – Дьокуускай хайысханан икки рейс оҥоһуллара былааннанар», – диэн бэлиэтээтэ Семен Коркин. Бу туһунан Ил Дарханын уонна Бырабыыталыстыбатын пресс-сулууспата иһитиннэрэр.

Ону сэргэ ыам ыйын 28 күнүттэн «В. Рукавишников» теплоход сырыыта саҕаламмытын бэлиэтээтэ.

Уу эбийиэктэригэр буруйу оҥорууну уонна быһылааны тахсыытын сэрэтэр, туоратар сыалтан, барыбыттан болҕомтолоох буолуу ирдэнэр. Уу эбийиэктэригэр куттал суох буолуута – биһиги барыбыт уопсай эппиэтинэспит. Бэйэбит уонна чугас дьоммут олохторун, доруобуйаларын харыстыыр туһугар, бары ирдэбиллэри тутуһан, сэрэхтээх буолуоҕуҥ! Этэҥҥэ сылдьыҥ!